Hăng anăn “Pơƀuh nao rai gru grua”, hrơi pơdă prưng lăi pơthâo brơi abih bang mơnuih 100 pok rup mơng ƀing phĭn rup mơng dua boh dêh čar Việt Nam hăng Hàn Quốc. Amăng anun, hơmâo 60 pok rup mơng ƀing phĭn rup mơng Hàn Quốc lăi pơthâo anŏ hiam mơng lŏn mơnai glai rưng, gru grua hăng ană mơng mơng kual lŏn Kim Chi; 40 pok rup mơng ƀing phĭn rup Việt Nam pơƀuh glăi anih hiam, tơlơi hơdip gru grua hăng tơlơi pơplih mơng kual lŏn Dak Lak lăi phara, Dap kơdư hnun mơn.

Tui ơi Hồ Sỹ Minh, kơ-iăng Khua khul mơnuih phĭn rup Việt Nam, hrơi pơdă prưng lĕ hrơi mông yôm phăn amăng hrơi mông pơbưp pơƀuh gru grua kơplah wah mơnuih phĭn rup dua boh dêh čar, pơgôp ngă dơlăm tui tơlơi rô nao rai ngă hrŏm yôm phăn djop mơta kơplah wah Việt Nam-Hàn Quốc. Hrơi pơdă prưng thun anai kơđŏm glăi jơlan găn rơgao 5 thun pơbưp nao rai kơplah wah Khul phĭn rup Việt Nam-khul phĭn rup Hàn Quốc hăng jing hrơi pơdă prưng tal 2 hơmâo pơphun ƀơi Việt Nam.

“Hơdôm pok rup rap kơ dêh čar Hàn Quốc pơdah gru grua yôm phara mơng ƀing gơñu, ăt hơmâo hơdôm tơlơi ngui ngor, kah hăng hơmâo lu djuai ania, hăng hơdôm rup rap pơƀuh brơi lŏn ia ta ăt tui anun mơn. Yua anun kâo pơmĭn hrơi pơdă rup anai lĕ hrơi mông pơbưp dưi pơƀuh tong ten ƀiă dong gru grua, kơ tuai čuă ngui hăng sit biă ñu lĕ thâo hluh rơđah dong ană mơnuih mơng kual lŏn anai. Hrơi pơdă prưng pơgôp ngă dua boh dêh čar, dua djuai ania pơlir jê̆ giăm ƀiă dong hăng thâo hluh tơdruă lu ƀiă dong”.

Anih pơdă prưng hơmâo pơphun ƀơi lan sang djă pioh gơnam sô hơđăp Dak Lak, ha bơnah lĕ sang glông gru grua mơng djuai ania Êđê, kơđŏm glăi gru grua yôm phara amăng bruă pơbưp nao rai tal anai.

Tơdơi kơ mông pơphun, ƀing phĭn rup Việt Nam hăng Hàn Quốc amra mut hrŏm hơdôm bruă pơčeh sit nik, ĕp lăng tơlơi hơdip, bruă mă hăng gru grua mơng ană plơi pla djop djuai ania ƀơi tơring čar Dak Lak.

Hlâo anun, mơng lơ 7/5, grup mơnuih phĭn rup 2 boh dêh čar hơmâo mông ngă bruă pơčeh sit nik, pơlir hăng hyu čuă ngui ƀơi hơdôm anih čuă ngui hiam hloh ƀơi sa, dua boh tơring čar kual ter hang ia rơsĭ Dơnung tong krah. Ơi Soun Byeong Hyo, Khua grup mơnuih phĭn rup Hàn Quốc, lăng yôm biă mă hơdôm pok rup rap mơng kual lŏn mơnai hăng ană mơnuih Việt Nam lăi hrŏm hăng Dak Lak hnun mơn:

“Mut hrŏm ƀing mơnuih phĭn rup mơng Việt Nam amăng hơdôm hrơi pơčeh phĭn rup, grup hơmâo phĭn mă lu rup rap hiam hăng lơm ba glăi pơ dêh čar Hàn Quốc, ƀing gơmơi amra lăi pơthâo brơi mơnuih ƀôn sang Hàn Quốc hơdôm pok rup pơƀuh anŏ hiam ƀơi Việt Nam, sit biă ñu ƀơi Dak Lak hăng Buôn Ma Thuột. Kâo rai pơ Việt Nam lu wŏt laih, amăng anun hơmâo Mù Cang Chải lĕ anih mơ̆ kâo phĭn lu rup hiam hloh hăng tŏ tui lĕ ƀơi anai, ƀơi Buôn Ma Thuột ăt hơmâo lu rup hiam. Kâo amra mơ-it glăi hơdôm pok rup hiam tơdơi kơ ĕp lăng glăi hơdôm pok rup phĭn amăng tal hyu čuă ngui anai.”./.