Bruă pơdă prưng ngă pơhưč 119 pok rŭp mơ̆ng 51 čô mơnuih juăt bruă rŭp hăng ƀu juăt bruă, mơnuih hor kơ rŭp hiam amăng đơ đam dêh čar gum hrŏm. Anai lĕ bruă mă sit nik kiăng čơkă mơ-ak hrơi hơdor glăi 120 thun Hrơi pơdŏng tơring čar Dak Lak.

Bruă pơdă prưng jing bruă bôh thâo hiam djru lăi pơhing hyu, lăi pơhưč rŭp rap plơi pla, ană mơnuih Dak Lak truh hăng mơnuih ƀôn sang, tuai hyu čuă ngui amăng lŏn ia hăng dêh čar tač rơngiao; ngă gal brơi kơ mơnuih thâo kač rup lăi pơthâo rup phrâo, anô̆ klă ñu hăng pơbưp, bơkơtuai, lăi pơthâo tơlơi găn rơgao, hruă kơjăp pran jua gum hrŏm hơbit, pơđĭ kyar hloh dong bruă mă mơ̆ng pô. Hrŏm hăng anun, rơgao kơ bruă pơdă prưng amra lar hyu dong, jing pran pơtrut kơ mơnih thâo kač rup hmâo dong hơdôm rup phrâo hăng hiam hloh, djru hrŏm kơ bruă bôh thâo kač rup mơ̆ng tơring čar Dak Lak./.