Tui hăng akŏ bruă, Dak Lăk pơsit jơlan đĭ kyar čơkă tuai hyu ngui mơtah mơda, hơđong, pơlir hăng djă pioh djŏp anŏ yom gru grua amăng plơi pla, anih anom glai klô, laih anun pơkra gơnam bơwih brơi kơ ƀing tuai hmư̆ hing mơ̆ng kual Dap Kơdư. Hơdôm mơta bruă či čơkă tuai akŏ phun lĕ hyu čuă lăng anih anom glai klô, pơdơi pơdă, hyu ngui amăng plơi pla sem lăng gru grua, hyu čuă lăng đang hmua, sem lăng kơphê, hyu ngui lăng rơman laih anun hyu ngui mut hrŏm anih gru grua atông čing kua Dap Kơdư. Ƀơi mông jơnum, lu khua pơ ala lăi Dak Lăk hơmâo lu tơlơi gêh găl đĭ kyar čơkă tuai kơnang kơ glai rưng, drai ia, čroh hnoh, dơnao ia hrŏm hăng gru grua hiam phara mơ̆ng Dap Kơdư. Khă hnun, tơring čar kiăng lăng glăi abih djŏp tơlơi glăk hơmâo či pơđĭ klă tui; djru ngă hlâo hơdôm mơta bruă čơkă tuai kơđŏm glăi amăng pran jua tơlơi phara. Ơi Phan Bửu Toàn, Kơ-iăng khua Khul tuai čuă ngui ƀôn prong Hồ Chí Minh lăi: “Kâo pơmin blung a lĕ Dak Lăk khŏm lăng glăi abih hơdôm mơta gơnam hơget ta hơmâo laih, ñu dưi ngă hơdơ̆ pă, gir ngă hăng ngă pơgiong hĭ, pơđĭ klă tui kiăng ƀing ta dưi bong kjăp anŏ gêh găl anun. Pơhmutu, lăi nao kơphê lĕ arăng pơmin nao kơ Dak Lăk mơtăm, gơnam mơ̆ng kơphê lĕ ƀu amuñ amĕ tui anun ôh, ñu jing tơlơi hơdip hăng kơphê, anun jing djŏp bruă ta hyu sem lăng, pel ĕp, mut hrŏm hăng tơlơi hơdip hơmâo kơphê, lơ̆m anun kơphê jing gơnam yom hloh. Tơdah ƀing ta ƀu hơmâo tơlơi phara mơ̆ng anŏ hơmâo hơđăp lĕ, ƀing ta khŏm ngă phara kơ anŏ ta pơčeh phrâo”.

Hơmâo mơn tơlơi pơgôp hiăp lăi, bruă čơkă tuai hyu ngui Dak Lăk ăt dŏ hơmâo lu tơlơi gun, kah hăng jơlan nao rai aka ƀu bơkơnar, kơƀah gơnam bơwih brơi klă, bơwih bơwang čơkă tuai ngui mlăm aset biă, laih anun aka ƀu hơmâo lu anom bơwih ƀong nao hlâo ngă pơhưč. Tui hăng ơi Đặng Xuân Vũ, Khua kông ti bơwih brơi tuai čuă ngui Đăk Việt, anŏ ƀu pơtruh hrŏm mơ̆ng hơdôm anih čơkă ngui ƀơi tơring čar glăk ngă tơnap či akŏ pơjing hơdôm tour hyu ngui ha amăng plĕ, bong ƀing tuai hor či dŏ glăi: “Gah Ngŏ hăng gah Yŭ tơring čar aka ƀu ngă hrŏm klă ôh, ră anai dŏ raih daih, drơi pơ ngă, laih anun dua kual anai ñu ataih biă. Anun yơh bruă ngă hrŏm jing sa tour glăk tơnap, tơdah bruă nao rai mơ̆ng ngŏ nao pơ yŭ tañ ƀiă jing tuai ñu hor či nao, laih anun bruă ngă hrŏm čơkă tuai amra amuñ hloh”.

Ơi Lê Phúc Long, Kơ-iăng khua gơnong bruă gru grua, bơkjăp drơi jăn hăng tuai čuă ngui Dak Lăk brơi thâo, tơring čar glăk hơmâo jơlan đĭ kyar čơkă tuai hyu ngui pel ĕp, sem lăng, sui ƀiă hrơi đih pơdơi glăi, laih anun kiăng ƀing tuai blơi yua gơnam lu ƀiă, lui hĭ pơƀut kiăng hơmâo lu tuai đôč. Hrŏm hăng anun, tơring čar gơñăm pơtruh hăng hơdôm boh tơring ter hang ia rơsĭ Dơnung Tong krah kiăng hơmâo anih čuă ngui pơtruh ia rơsĭ hăng čư̆ siăng: “Sit hơdôm tơlơi dŏ gun anun yơh ngă kơ bruă čơkă tuai hyu ngui Dak Lăk nao tơdơi hloh kơ hơdôm boh tơring pơkŏn, kah hăng Gia Lai ƀudah Khánh Hoà, Lâm Đồng. Gơnong bruă ăt ngă hrŏm hăng hơdôm anom bruă či lăi pơthâo hăng Jơnum min mơnuih ƀôn sang tơring čar, hơdôm tơlơi bơdjơ̆ nao Kơnuk kơna, ding jum, anom bruă lĕ khŏm tơguan ding jum, anom bruă lăi glăi. Kiăng đĭ kyar bruă čơkă tuai lĕ Gơnong bruă lăi pơthâo, pơphô brơi hơdră djru đĭ kyar čơkă tuai hyu ngui amăng plơi pla ăt kah hăng hơdôm bruă hyu ngui pơkŏn, mơ̆ng anun hơmâo hơdră djru kiăng hơdôm boh tơring ăt kah hăng anom bruă pok pơhai ngă tui pơ anăp”./.