Găn rơgao lu thun blan bơyan adai nao pơ klôn adih, pra yang Pô Sah Inư ăt dŏ hnơ̆ng dong kơjăp kah hăng sa kơnôl hơdor glăi gru grua đưm, djă pioh rơnoh yom ia rơgơi tơlơi kơhnâo đưm gru grua djuai ania Čăm ƀơi kual lŏn Bình Thuận hơđăp, ră anai Lâm Đồng. Thun blan rơgao, hrŏm hăng bruă djă pioh kông ngăn gru grua đưm, pioh nao ĕp lăng, găn rơgao dŏ glăi hơduah tơña arăng pơphun na nao đôč, biă mă ñu amăng hrơi mông ngă yang, pơdơi pơdă čơkă thun phrâo, bơyan pơdơi prong, hơmâo bluh nao jua angin tơlơi hơdip phrâo kơ anih tuai čuă ngui Gru grua pra yang Pô Sah Inư. Tuai anăn Nguyễn Anh Tuân, mơ̆ng tơring čar An Giang brơi thâo:

“Kâo ƀuh hơdôm anih anom gru grua djuai ania Čăm đưm anai hiam biă mă, kiăng djă pioh wai pơgang klă, kông ngăn gru grua hiam brơi kơ djop djuai ania sang anŏ hrŏm amăng Việt Nam anai dưi pơđĭ kyar tui”.

Anih gru grua đưm pra yang Pô Sah Inư, sa gru grua ia rơgơi man pơdong, tơlơi đăo yang rơbang phara biă mă mơ̆ng djuai ania Čăm dŏ glăi, djă pioh hnơ̆ng hnăi. Hăng tơlơi thâo hiam rô̆ anŏ man podong đĭ, pra yang Pô Sah Inư hơmâo anăn dăp hnơ̆ng Anih gru grua đưm dêh čar hăng hlăk dŏ jing anih pơhưč tuai hyu ngui hor nao ĕp lăng, tuai amăng dêh čar hăng mơ̆ng tač rơngiao.

Nao pơ anun, ƀing tuai amra hyu sem, lăng djop mơta rup pơƀuh kơ ayun suang Apsara djuai ania Čăm. Hơdôm tơlơi ayun suang ƀư̆ drơi, hăng er tơlơi adoh rơnang, mut tơma hrŏm djop gông brô̆, đing  diăp ayuh tui tơlơi adoh đưm djuai ania Čăm kah hăng: Hơgor Ginăng, hơgor Paranưng, đing diap saranai….ngă kơ tuai pơhưč pran jua. Hrŏm hăng anun, ƀing tuai amra ĕp lăng plơi pla, bruă pơkra ming gơnam mơ̆ng lŏn krăi, lŏn khur, pơjing čơlŭ mong, gŏ amŏ, bruă mơñam mrai đưm djuai ania Čăm. Ơi Bá Sinh Tý, grup adoh suang gru grua đưm Čăm ƀơi pra yang Pô Sah Inư brơi thâo:

“Grup adoh suang gru đưm djuai ania Čăm gơmơi pơ anai sui laih hơmâo. Gơmơi pơdah adoh suang hăng pĕ gông atông brô̆ ayup đing brơi tuai hmư̆ er tơlơi adoh đưm djuai ania Čăm, ƀing tuai hor hmư̆ hăng mơak biă mă. Sit đĭ rai lăng pra yang, tuai kiăng lăng jơlan hơdră tơlơi adoh suang gru grua đưm djuai ania čăm đôč”.

Hrŏm hăng djă pioh anih gru grua, pra yang đưm, hơdôm thun giăm anai khul wai lăng anih gru grua pra yang Pô Sah Inư hơmâo ding nao anŏ tŭ yua bơwih brơi tuai lăng anŏ hiam, dŏ glăi ĕp lăng lu mơta kiăng pơhưč pran jua mơak. Amai Châu Thị Cấm Tú, tuai rai mơ̆ng tơring čar Vĩnh Long kah pơpha:

“Kâo ƀuh pơ anai rơnuk rơnua biă mă, kret kruai dơnai djong hăng lăp pơpŭ hiam. Kâo ƀuh anih anom wơ̆t ană mơnuih pơ anai thâo jưm tuai, rơnang mơak, mut hrŏm, jĕ giăm. Kâo pô hăng abih sang anŏ gơmơi pơpŭ biă mă yua mưn amăng pran jua hăng tŭ mă tơlơi hiam mơak anun”.

Bruă lir hơbit, hơdai gum hrŏm hyu čuă ngui, hơduah ĕp gru grua đưm, phun akhan hăng ĕp lăng tơlơi adoh suang mơak hơmâo pơgôp hrŏm pơjing rai gơnam sĭ mơdrô kơ tuai rơnguai djă ba gru grua hiam phara biă mă. Khul pra yang Pô Sah Inư đưm đă hlăk jing anih tuai hyu ngui djă jă gru grua nam đưm dêh čar, gru grua hiam hăng tơlơi đăo kơ yang rơbang djuai ania Čăm amăng kual lŏn Ngŏ Lâm Đồng, jai hrơi pơhưč lu tuai rơnguai hyu ngui hloh.