Dơ̆ng mơ̆ng sa mơta boh ƀong jơman đôč, sầu riêng ƀudah boh durian Dak Lak hlăk dưi hơmâo ƀing thâo pơkra ming mơnong ƀong huă lông pơjing hăng lu mơta mơnong ƀong jơman phrâo, bơwih brơi kơ ƀing tuai hyu sem lăng ƀong ngui boh troh anai.

Ƀơi mông jơnum ngui pơdă sĭ mơdrô mơnong ƀong huă Sầu riêng Dak Lak thun 2026, 102 mơta mơnong ƀong pơkra hrŏm mơ̆ng boh sầu riêng, hơmâo čih pioh amăng hơdrôm hră djă pioh bruă ngă phrâo hloh Việt Nam.

Ƀơi mông jơnum ngui bruă Sầu riêng Dak Lak thun 2026, pơphun mơ̆ng kơnôl 15/8 truh kơnôl 23/8 ƀơi lan sang, anih dŏ phrâo Eco Palace, phường Ƀuôn Ma Thuôt, hơmâo 200 čơgăn pơdă gơnam, hơmâo djop mơta mơnong ƀong, pơkra ming lŭk hăng boh sầu riêng hăng hơdôm mơta mơnong ƀong jơman pơkŏn ƀơi Dak Lak. Ƀơi mông pok jơnum mơguah kơnôl 16/8, Khul khua pơphun bruă mă jao pri apah bơni tal pơplông hơmâo pơsit čih pioh amăng hơdrôm phrâo hloh Việt Nam hăng 102 mơta mơnong ƀong hơmâo anăn sit nik dưi pơkra rai mơ̆ng boh durian Dak Lak hăng jao hră  apah bơni tŭ yap ƀing thâo tơnă asơi hơbai, pơkra ming gơnam ƀong huă jơman hloh. Tui hăng khul čom puang, bruă pơjing rai 102 mơta mơnong ƀong anai ƀu kơnong pơhưč tal jơnum ngui đôč ôh, dŏ jing bruă ngă pơčeh phrâo pơđĭ tui rơnoh sĭ mơdrô boh sầu riêng, kiăng pơjing rai lu mơta mơnong ƀong jơman hloh bơwih brơi kơ tuai rơnguai hăng bruă pơkra ming gơnam sĭ mơdrô.