Amăng hrơi pơ-iă hang bơyan phang ƀơi kual Dap kơdư, jua dik dak mơ-ak mơng hơdôm tơlơi ayun suang Lăm Vông, hăng dik jua čing ding jua hơgor, mơnuih ƀôn sang Lào ƀơi anai yak nao bơyan ngă yang prong hloh amăng ha thun. Tết Bunpimay, ƀudah arăng juăt iâu Tết săi ia lĕ Tết pok pơphun brơi sa thun phrâo tui thun đăo phơ̆t kah hăng bơyan rao rơgoh drơi jăn, pơkiăo đăo tơlơi ƀu hiam klă, rơkâo tơlơi rơnuk rơnua, yâo mơ-ak.

Ơi Lê Văn Nuôi, Kơ-iăng Khua Jơnum min mơnuih ƀôn sang tơring glông Buôn Đôn brơi thâo, thun anai, Tết Bunpimay ƀơi Buôn Đôn ăt lĕ bruă mă dong amăng tal hơdor glăi 30 thun akŏ pơjing tơring glông Buôn Đôn, 50 thun hrơi pơklaih rơngai kual Dơnung, pơlir lŏn ia jing sa, čơkă rơnuk pơđĭ kyar phrâo hăng tơlơi git gai mơng gong gai dua gưl:

“Thun anai pioh hơdor glăi hơdôm hrơi gru grua amăng thun, yôm hloh dong lĕ thun anai lĕ thun rơnuč lui hĭ gong gai gưl tơring glông, yua anun kiăng djă pioh brơi gưl să, mơng anun ƀing gơñu amra tŏ tui gru grua anai. Thun anai ăt pơphun lu bruă mă phara, pơhmutu lĕ pơtô pơblang kơ bul pơtâo Hoàng Sa, Trường Sa lĕ bul pơtâo Việt Nam, dua dong amra hơmâo grup adôh suang mơng tơring glông Lak nao ngui hrŏm kơplah wah djuai ania M’nông hăng djuai ania Lào”.

Hrŏm hăng neh met wa Lào, lu mơnuih djuai ania ƀiă pơkŏn glăk dŏ hơdip ƀơi Buôn Đôn ăt nao ngui mơ-ak hrŏm amăng bơyan ngui ƀong Tết Bunpimay. Amai Vy Thị Mới, djuai ania Nùng, dŏ amăng să Ea Bar lăi pơthâo tơlơi hok mơ-ak mơng ñu lơm mut hrŏm hơdôm tơlơi ngui ngor anun lĕ akă hrĕ mrai ƀơi tơngan, mơnơi brơi phơ̆t hăng săi ia:

“Tal blung a kâo mut hrŏm ngui ƀong tết Lào, hok mơ-ak biă mă, mơnuih rai ngui hur har mơ-ak, ƀing gơmơi hơmâo arăng akă hrĕ mrai ƀơi tơngan brơi rơkâo brơi tơlơi tơphă hăng ba glăi tơlơi hiam klă amăng tơlơi hơdip mơda”.

Akă hrĕ mrai ƀơi tơngan, tui pơmĭn mơng mơnuih Lào, lĕ tơlơi yôm amăng hrơi ngui Tết, lơm anun pơjâo ƀudah mơnuih pơprong amra akă hrĕ mrai kô̆ ƀơi tơngan pô pơkŏn hăng pơpŭ brơi tơlơi hiam klă brơi ƀing gơñu. Hơdôm tơlơi ngă yang mơnơi brơi phơ̆t, bôr čuah ƀudah săi ia ăt pơdah tơlơi yôm hăng tơlơi pơmĭn hiam klă. Lăi nao tơlơi yôm mơng hơdôm tơlơi ngă yang, ayong Y Nô Ly Kbur, mơnuih djuai ania Lao dŏ hơdip ƀơi să Krông Na brơi thâo:

“Lơm ƀing gơmơi akă hrĕ mrai, ƀing pơjâo amra iâu lăi brơi ƀing gơmơi kiăng ƀing gơmơi hơmâo tơlơi tơphă, bơ bôr čuah kiăng pơdah pran gum pơgôp kơplah wah djop djuai ania, bơ săi ia lĕ kiăng rao rơgoh đuăi hơdôm tơlơi ƀu mơ-ak klă amăng tơlơi hơdip mơda mơng ƀing gơmơi kiăng ƀing gơmơi hơmâo tơlơi hơdip tơphă hăng yâo mơ-ak ƀiă dong”.

Tết Bunpimay ƀơi Buôn Đôn jai dik dak, tơlơi klao mơ-ak mut hrŏm hăng jua gông brô̆ laih dong tơlơi ayun suang Lăm Vông gru grua. Amai H’Ưng Êban, dŏ amăng ƀuôn Yang Lành, să Krông Na, tơring glông Buôn Đôn ol kơdol lăi:

“Kâo mut hrŏm ngui Tết Lào thun anai lĕ thun tal 4 laih, thun anai tơring glông pơphun pơprong ƀiă hăng lu neh met wa mut hrŏm. Kâo ƀuh jơlan hơdră ngui Tết Lao anai yôm phăn biă mă, dưi pơlir ană mơnuih, pơlir djop djuai ania. Kâo hok mơ-ak biă mă, ră anai jua gông brô̆ Lăm Vông glăk pĕ hăng kâo ăt kiăng mut nao ayun suang hrŏm”.

Ƀu djơ̆ kơnong lĕ anih ngui gru grua, Tết Bunpimay ăt pơƀuh glăi hơdôm tơlơi ngă giang mah yôm phăn kơplah wah dua djuai ania Việt Nam-Lao. Hăng ơi Đinh Công Trình, tơhan hơđăp juăt blah wang ƀơi Lao mơng thun 1969 truh 1973, anai lĕ hrơi mông yôm phăn biă mă:

“Hlâo adih hơmâo tơlơi djru ba mơng neh met wa Lao, mơng hra ƀong, ia mơñum, mah duam ruă ăt hơmâo djru pơjrao brơi mơn. Ră anai rai pơ anai ngui ngor hrŏm, kâo hok mơ-ak biă mă, dưi hơdor glăi tơlơi gum pơgôp mơng neh met wa Lào kah hăng čang rơmang kơnuk kơna dua bơnah đing nao pơjing pran jua ngă giang mah Việt Nam-Lào jai hiam klă, hơđong kjăp”.

Tết Bunpimay tui gru grua mơnuih ƀôn sang Lào ƀơi Buôn Đôn-ƀu djơ̆ kơnong lĕ hrơi ngui kơ sa djuai ania đôč ôh mơ̆ ăt pơdah anŏ hiam mơng pran gum pơgôp, tơlơi tơkuh nao rai gru grua djop djuai ania adơi ayong amăng kual giăm guai ƀơi tơring čar Dak Lak./.