Jơlan hơdră hăng anăn “Mơng Huila hrưn tơbiă amăng rŏng lŏn tơnah” yua Sang anih jưh pơ ala dêh čar Colombia ƀơi Việt Nam gum hrŏm hăng hơdôm anom bruă ƀơi ƀôn prong Đà Nẵng pơphun. Amăng jơlan hơdră, ƀing adôh suang hlăk ai Colombia lăi pơthâo tơl mơnuih ƀôn sang hăng tuai rơnguai ƀơi Hội An hơdôm djuai gông brô̆, tơlơi ayun suang mơ-ak anun lĕ Bambuco, Rumba Campesina, Rajaleña hăng Sanjuanero. Mut hrŏm jơlan hơdră ăt hơmâo ƀing čơđai ƀôn prong Đà Nẵng.

Amăng hơdôm tơlơi ngui, ƀing hlăk ai dua bơnah hơmâo mông pơbưp, pơƀuh nao rai hăng thâo hluh ƀiă dong kơ gru grua tơdruă. Bruă mă anai dong amăng bruă pơčeh pơtom hiăp bơrơguăt drơi jăn hăng gru grua mơng Ding jum pơtom hiăp Colombia, anăp nao pơtrut pơmut hrŏm mơnuih mơnam, hơdip rơnuk rơnua hăng pơƀuh nao rai gru grua, sit biă ñu hluai tui hơdôm bruă brơi ƀing hlăk ai.