VOV4.Jarai -  Lu thun jê̆ hăng anai hơdôm pok hră čih mơng Jơlan hơdră pơhing “Gum hrom čơđai nao sang hră” yua kơ Keh prăk pơgang hăng Pơđĭ kyar pơlar dlai klô tơring čar Kontum ngă tui amăng akô̆ thun hrăm phrâo hmâo djru laih ƀing čơđai sang hră, biă ñu ƀơi kual djuai ania ƀiă, kual asuek, ataih tơnap tap amăng tơring čar hmâo hră čih nao sang hră. Ƀu djơ̆ kơnong kơ hnun đôč ôh, hră čih anai dô̆ hmâo tơlơi pơhing kiăng lăi kơ anô̆ mơtah ngă tui klă hơdră bruă prăk apah pơgang dlai klô kiăng pơgang pơlar dlai klô kơjăp phik hăng pơplih phrâo bruă mă kơ mơnuih ƀôn sang.

Sang hră gưl sa Nguyễn Văn Cừ, ƀơi să tơnap tap Đăk Pxi, tơring glông Đăk Hà hmâo 275 čô čơđai sang hră kah hăng abih bang lĕ čơđai sang hră djuai ania Hơdang. Hlâo kơ thun hră phrâo 2021-2022, Grŭp khua apăn bruă Sang hră pơpha nai pơtô nao pơ̆ rim sang dô̆ čơđai sang hră ƀơi 3 bôh plơi: Đăk Kơ Đương, Đăk Rơ Wang hăng Đăk Wer pel ĕp bôh nik čơđai sang hră ƀơi anai. Bôh tơhnal brơi ƀuh lu čơđai sang hră kơƀah hră čih, hơdrôm hră hrăm hăng wot sum ao pioh nao sang hră dong. Tơlơi mơ-ak truh hăng nai hăng čơđai sang hră Sang hră gưl sa Nguyễn Văn Cừ lom hmâo tơlơi pơhing mơng Keh prăk pơgang hăng pơđĭ kyar pơlar dlai klô tơring čar Kontum ngă tui dong jơlan hơdră lăi pơphing “Gum hrom čơđai nao sang hră” pơpha brơi rim čơđai sang hră 7 pok sop hră čih hmâo in tơglit tơlơi pơhing lăi kơ pơgang dlai klô hăng ngă tui hơdră bruă apăh pơgang dlai klô ƀơi kơđuh hră čih. Nai Nguyễn Trung Dũng, Khua Sang hră brơi thâo:

“Mrô hră čih dưi pha brơi pơhlôm djop kơ ƀing čơđai sang hră mơng anih sa truh anih 5 amăng sa thun hrăm. Gah anô̆ klă hră čih ăt kah hăng hơdôm tơlơi pơhing kiăng lăi nao in tơglit rơđah rơđông djru hrom sang hră pơtrut bruă pơtô pơhrăm ƀing čơđai pơplih amăng bruă mă, tơlơi pơmin. Rơgao hơdôm tơlơi pơhing lăi pơthâo, hơdôm bôh yôm mơ̆ Keh prăk pơgang dlai klô hmâo pơdah laih amăng anun hrom hăng sang hră pơtô pơhrăm ƀing čơđai kiăng khăp kơ ayuh hyiăng, thâo lăng yôm kơ dlai klô hăng thâo bơwih brơi kơ anih anom pô dô̆ hơdip mơda, amra ngă brơi plơi pla pơplih phrâo tơlơi pơmin kiăng ngă klă bruă pơgang hăng pơlar dlai klô ƀơi plơi pla pô”.

Sang hmâo lu adơi ayong nao sang hră, dưi pha brơi hră čih mơng Jơlan hơdră lăi pơhing “Gum hrom čơđai nao sang hră”, adơi Y Thị Thư, djuai ania Hơdang, čơđai sang hră anih 4A brơi thâo, gơnang kơ anun mơ̆ amĭ ama ñu huăi bơngot kơ bruă blơi hră čih kơ ƀing gơñu kiăng djă pioh prăk kơ bruă pơkon. Ñu ăt ƀuh hor mơn hơdôm hră čih anai:

“Kâo hăng ƀing gŏp kâo dưi pha brơi hră čih pioh čih hră kâo ƀuh mơ-ak biă. Kâo pơđok hăng dlông hră čih anai kâo ƀuh kiăng khăp dlai klô biă”.

Ngă tui Jơlan hơdră pôr pơhing “Gum hrom čơđai nao sang hră”, hlâo kơ thun phrăm phrâo 2021-2022, Keh prăk pơgang hăng pơlar dlai klô tơring čar Kontum hmâo ba nao laih pơ̆ 169 bôh sang hră ƀơi 76 bôh să, tơring kual amăng 10 bôh tơring glông, plơi prong amăng tơring čar 600.000 sop hră čih hăng 5.000 bôh muk pơpha brơi kơ čơđai sang hră. Ƀơi kơđuh hră čih hăng muk leng kơ in tơglit hơdôm tơlơi lăi pơhing kơ hơdră hră apah pơgang dlai klô hăng wai lăng pơgang dlai klô. Bruă ngă anai djru rah ƀing čơđai sang hră hmâo hră čih, laih anun djơ̆ hăng tơlơi kiăng pôr pơhing lăi pơthâo truh abih bang mơnuih ƀôn sang plơi pla amăng kual bruă apah pơgang dlai klô. Ơi Phan Thế Vinh, Khua Jơnum min mơnuih ƀôn sang să Hiếu, tơring glông Kon Plông brơi thâo:

“Akô̆ thun hrăm hơdôm thun Keh prăk leng djru hră čih kơ čơđai gum hơgôp ngă gal brơi kơ ƀing čơđai amăng bruă hrăm. Hră čih mơng Keh prăk ƀơk brơi ƀing čơđai ƀơi kual neh wa djuai ania ƀiă, kual tơnap tap hmâo in tơglit tơlơi pơhing. Hluai tui tơlơi pơhing anun sang hră ăt hmâo lăi pơhing mơn pơsur čơđai sang hră kơ pơgang dlai klô. Hluai tui ƀing čơđai sang hră lĕ amĭ ama čơđai sang hră ăt thâo mơn kơ tơlơi pơhing anai, pơđĭ tui tơlơi pơmin wai lăng pơgang dlai klô ƀơi să”.

Tui hăng ơi Hồ Thanh Hoàng, Khua Keh prăk pơgang hăng pơlar dlai klô tơring čar Kontum, hơdôm thun hrăm phrâo, Keh prăk leng kơ gum hrom hăng Grŭp khua mua hơdôm bôh Sang hră pơphun ngă Lơphet ƀơk hră čih hăng muk klum pơkĕ hrom lăi pơhing kơ hơdră bruă apah prăk pơgang dlai klô kiăng ƀing čơđai thâo. Khă hnun hai, thun hrăm anai, yua bơdjơ̆ nao mơng klin ruă Covid-19, anom bruă ƀu ngă tui kah hăng kơčăo bruă ba tơbiă blung a mơ̆ pơpha mơnuih hăng rơdêh pơgiăng hră čih, muk klum truh rim sang hră, jao kơ Grŭp khua mua sang hră pioh pha brơi kơ ƀing čơđai sang hră. Khă bơdjơ̆ nao yua kơ klin Covid-19, Jơlan hơdră lăi pơhing “Gum hrom čơđai nao sang hră” yua Keh prăk pơgang hăng pơlar dlai klô tơring čar Kontum pơphun ăt glăk lar hyu mơn tơlơi kiăng khăp hăng kiăng lăi pơhing, ngă tui hơdră bruă yua prăk apah pơgang dlai klô kiăng pơgang hăng pơlar dlai klô kơjăp hăng pơplih bruă mă kơ mơnuih ƀôn sang./.

Khoa Điềm: Čih – Siu H’ Prăk: Pơblang