VOV4.Jarai - Lơ 7/10, ƀơi anih pơphun jơnum plơi prong Đà Lạt, Grup khua git gai pơ ala mơnuih ƀon sang dêh čar tơring čar Lâm Đồng hơmâo bưp mơnuih ƀon sang djŏp anom bruă, khul grup Ping gah, gong gai, Jơnum min djŏp djuai ania mơnuih mơnam Việt Nam tơring čar hăng hơdôm boh tơring glông Lạc Dương, Đơn Dương, Đức Trọng jơnum bưp ƀơi anăp hăng lăng amăng tivi. Ƀơi mông bưp, ƀing khua git gai pơ ala mơnuih ƀon sang dêh čar hơmâo lăi pơhmư̆ kơ mơnuih ƀon sang Lâm Đồng kơ hơdôm tơlơi yôm mơng jơnum lok 2, Khua git gai pơ ala mơnuih ƀon sang dêh čar tal 15 him lăng pơphun amăng lơ 20/10 truh lơ 13/11 pơ anăp; lăi pơthâo glăi tơlơi bơwih ƀong huă- mơnuih mơnam mơng tơring čar amăng amăng dêh čar 9 blan akŏ thun hăng kơčăo bruă 3 blan rơnuč thun 2021.

Ơi Trần Đình Văn, Kơ-iăng khua git gai Ping gah tơring čar, Khua grup pơ ala mơnuih ƀon sang dêh čar tơring čar Lâm Đồng hmư̆ tơlơi rơkâo mơng mơnuih ƀon sang

Rơngiao kơ tơlơi đăo gơnang, lăng ba mơng Ping gah, Kơnuk kơna amăng bruă pơtrut đĭ kyar bơwih ƀong huă - mơnuih mơnam, pơgang klin Covid-19, mơnuih ƀon sang tơring čar Lâm Đồng lăi nao lu bruă kiăng pơsir hăng pơplih ming. Anun lĕ bruă wai lăng glai rưng dŏ tơdu, ba sĭ gơnam mơng hmua ƀu hơđong, pơkra gơnam mơng hmua hơdjă hơmâo nua pơmă samơ̆ aka ƀu kơtang ôh, bruă brơi čan prăk mă kơmlai lu ăt hơmâo na nao đôč amăng plơi pla, bruă amuñ hơmâo klin Covid-19 ƀơi hơdôm sang čơ prong hăng mơnuih mơgat rơdêh pơđuăi jơlan ataih...

Siu H’Mai: Pơblang