VOV4.Jarai-Mơguah lơ 24/8, Khua tơhan krên dên gah ling tơhan blah ngă, ơi Phan Văn Giang, ding kơna ding jum kơđi čar, Kơ-iăng khua git gai ping gah ling tơhan dêh čar, Khua ding jum ling tơhan hăng Kơ-iăng khua dêh čar ơi Lê Văn Thành nao čuă, pơtrut pran jua ƀing nai ia jrao, ơi ia jrao, khua mua, ling tơhan dŏ mă bruă pơ anăp pơgang klin ƀơi sang ia jrao tơhan 175, djop anih pơgăn jơlan pơgang klin amăng ƀôn prong Hồ Chí Minh.

Pơhiăp ƀơi mông jơnum, ơi Lê văn Thành Kơ-iăng khua dêh čar bơni kơ ling tơhan blah ngă lăi hrom, ƀing ơi ia jrao ling tơhan hnun mơ̆n, amăng anun sang ia jrao prong ling tơhan 175 hur har kơsung nao pơ anăp, pơhlôm, pơgang klin; laih dơ̆ng rơkâo ƀing khua mua, ling tơhan ngă klă bruă pơgang tơlơi rơnuk rơnua, hơđong laih anun djru djop mơnong ƀong huă kơ mơnuih ƀôn sang dŏ ƀơi anih hơmâo klin; pơgăn hĭ tong ten klin ƀă hyu kơ tơhan ngă bruă pơgang klin.

Ăt amăng mơguah lơ 24/8 mơ̆n, grup mă bruă anai, nao čuă, ĕp lăng hăng juh alum ƀing khua mua, ling tơhan dŏ mă bruă pơhlôm, pơgang klin laih anun djru ba mơnong ƀong huă ječ ameč kơ mơnuih ƀôn sang ƀơi kuân Bình Tân, ƀôn prong Hồ Chí Minh.

Nay Jek: Pơblang