VOV4.Jarai-Grup khua mua pơ ala mơnuih ƀôn sang Việt Nam yua ding kơna ding jum kơđi čar, Kơ-iăng khua git gai pơ ala mơnuih ƀôn sang dêh čar, ơi Trần Thanh Mẫn ngă khua khul, nao jơnum hrom lok 207 mơ̆ng Khul git gai pơlir hơbit khua mua pơ ala mơnuih ƀôn sang rong lŏn tơnah IPU hăng hơdră jơnum lăng nao rai amăng tivi.

Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn

Jơnum lok 207 anai mơ̆ng Khul git gai IPU pơphun tui hơdră lăng nao rai amăng tivi amăng 2 hrơi, dơ̆ng mơ̆ng lơ 24 truh lơ 25/5/2021 pioh bơkơtuai hăng ba tơbiă hră pơtrun kơ bruă yôm pơdjơ̆ nao khul ngă hrom anom bruă khua pơ ala mơnuih ƀôn sang prong hloh lŏn tơnah. Khua IPU ơi Duarte Pacheco git gai mông jơnum, hơmâo ƀing khua mua pơ ala mơ̆ng 135 boh dêh čar ngă ding kơna.

Jơnum anai pơtum bơkơtuai akŏ bruă “Găn rơgao klin kheng hrơi anai hăng akŏ pơdong sa bruă mă hrơi pơgi kơdih hiam klă hloh: Tơlơi gơgrong mơ̆ng djop sang bruă pơ ala mơnuih ƀôn sang”.

Nay Jek: Pơblang