VOV4.Jarai -  Tŏ tui mông jơnum ƀu pơkă hlâo, mơguah lơ 6/1, bơkơtuai ƀơi grup, Grup khua pơ ala mơnuih ƀon sang dêh čar tơring čar Dak Lăk hơmâo pơƀut bơkơtuai kơ Tơlơi phiăn pơkra, pơhrua tui sa, dua tơlơi mơng Tơlơi phiăn tuh pơ plai prăk ngă bruă čar, Tơlơi phiăn Tuh pơ plai ngă bruă hrŏm kơnuk kơna mơnuih ƀon sang, Tơlơi phiăn tuh pơ plai, Tơlơi phiăn juă nua, Tơlơi phiăn apui lơtrik, Tơlơi phiăn Anom bơwih ƀong, Tơlơi phiăn prăk jia blơi yua gơnam phara hơjăn, Tơlơi phiăn kơđi mơnuih ƀon sang tui mông jơnum ba tơbiă.

 Ƀing khua pơ ala mơnuih ƀon sang ƀơi Dak Lăk tŭ ư pơkra, pơhrua tui hơdôm mơta tơlơi mơng 8 tơlơi phiăn đah mơng dưi ngă klă, djŏp tơlơi pơtrun mơng Ping gah hăng pơsir brơi tañ hơdôm tơlơi tơnap, aka ƀu rơđah. Pơgôp hiăp kơ Tơlơi phiăn tuh pơ plai ngă bruă kơnuk kơna, ơi Y Vinh Tơr, Khua grup pơ ala mơnuih ƀon sang ƀơi Dak Lăk tŭ ư hăng 3 mơta tơlơi kiăng pơplih, pơhrua tui, samơ̆ ñu kiăng lăng nao klă hloh bruă kah pơpha, jao bruă, tơlơi gơgrong hăng hơdôm bruă mă mơng prăk ODA.

Siu H’Mai: Pơblang