VOV4.Jarai -  Tô̆ tui jơlan hơdră tal jơnum lok 2, Khua pơ ala mơnuih ƀôn sang tal 15, mơguah lơ 26/10, Grŭp khua pơ ala mơnuih ƀôn sang tơring čar Daklak hmâo bơkơtuai hăng tŭ ư hrom laih hơdôm tơlơi gum pơhiăp kơ bôh yôm hră čih pơkra Tơlơi phiăn tơhan polih hơdeč hmar.

Khua pơ ala Lê Thị Thanh Xuân tơgŭ  pơhiăp amăng tal jơnum

Tơdơi kơ hmư̆ hră lăi pơthâo kơ Hră čih pơkra tơlơi phiăn polih hơdeč hmar, Grŭp Khua pơ ala mơnuih ƀôn sang tơring čar Daklak hmâo tŭ ư hrom prong kơ tơlơi kiăng hloh mơng bruă pơđĭ tui Phiăn pơtrun tơhan polih hơdeč hmar jing Tơlơi phiăn tơhan polih hơdeč hmar. Ƀing khua pơ ala lăi lĕ, bruă pơđĭ jing tơlơi phiăn hmâo čih pioh laih tơlơi gum hơgôp bruă mă mơng khul tơhan polih hơdeč hmar amăng bruă pơhlôm rơnuk rơnua lŏn ia. Gum pơhiăp kơ hră čih pơkra tơlơi phiăn Tơhan polih hơdeč hmar, ƀing khua pơ ala tơring čar Daklak rơkâo: Amăng tơlơi phiăn hmâo lăi nao truh 2 tơlơi dưi phrâo mơng khul tơhan polih hơdeč hmar anun lĕ: Dưi djă ba phao kơtoang, gơnam djru bruă, rơdêh măi mok amăng tơdrun tum păn hăng ƀơi rơdêh por; Dưi prăp lui ƀat tô, tơdron rơdêh por kiăng djru bruă mă, tơlơi anai jing djơ̆ hăng bruă mă mơng pô./.

Siu H’ Prăk: Pô pơblang