VOV4.Jarai - Tlam tom brơi lơ 5/7, Grup mă bruă mơng Ding jum ia jrao yua ơi Kơ-iăng khua ơi Đỗ Xuân Tuyên, ngă khua grup hơmâo mông nao lăng bruă pơgang klin Covid-19 ƀơi tơring čar Phú Yên. Grup mă bruă mơng Ding jum ia jrao nao lăng bruă pơgang klin ƀơi anih dŏ pơčlah phường Phú Đông, plơi prong Tuy Hòa; sem lăng bruă pơjrao mơnuih ƀă klin Covid-19 ƀơi Sang ia jrao pơdong jăng jai plơi prong Đông Hòa; nao lăng bruă pơgăn anih hơmâo mơnuih ƀă klin, anih pơčlah ƀơi phường 1, plơi prong Tuy Hòa. Mơng bruă pel ĕp sem lăng, Kơ-iăng khua Ding jum ia jrao Đỗ Xuân Tuyên lăi tơring čar Phú Yên hơmâo ngă tui djŏp hơdră pơhlôm, pơgang klin Covid-19. Ơi Đỗ Xuân Tuyên pơtă pơtăn,  tơring čar Phú Yên hăng plơi pla ƀu dưi pơ-ai ôh, khŏm răng kơđiăng, khŏm pơgang klin tui hơdră “4 ƀơi anih”.