VOV4.Jarai -  Mơguah lơ 14/10, Grŭp mă bruă Ping gah ƀôn prong Hồ Chí Minh pơphun Jơnum tal 9. Pơhiăp amăng mông pok phun, ơi Nguyễn Văn Nên – Ding kơna Ding jum kơđi čar, Khua git gai Ping gah ƀôn prong brơi thâo, amăng 9 blan thun 2021, tơlơi klin ngă tơnap biă, ƀôn prong khom mă yua tơlơi dô̆ čơlah mơnuih mơnam sui hrơi blan. Tơlơi anai bơdjơ̆ nao abih bang hăng dơlăm truh bruă bơwih ƀong hăng bôh thâo, mơnuih mơnam mơng ƀôn prong.

Abih bang bruă mă bơdjơ̆ nao, lu mrô hrŏ trun dơlăm, amăng anun GRDP 9 blan hrŏ trun 4,98%. Truh ră anai ƀôn prong Hồ Chí Minh phun ñu dưi wai lăng laih klin ruă. Khă hnun hai, ƀôn prong khom gir run lu hloh dong kiăng ngă tui Tơlơi pơtrun pơsit 128 mơng Kơnuk kơna hăng pơtô brơi mơng Ding jum ia jrao kơ bruă jăng jai ngă juăt pơhlôm, pơplih lom kiăng, wai lăng ba glăi bôh tơhnal klin Covid-19. Phrâo tom anai, Khua mir sir dêh čar ta ơi Nguyễn Xuân Phúc hmâo pơsit yôm laih tơlơi gir run amăng bruă pơgang pơgăn klin hăng lăi đĭ hơdôm tơlơi kiăng pơsir pơ̆ anăp anai./.

Siu H’ Prăk: Pô pơblang