VOV4.Jarai - Khul hlăk ai rơnuk Hồ Chí Minh, Khul pơlir hơbit hlăk ai Việt Nam phrâo pơphun jơlan hơdră djru pơhrŏ trun nua sĭ gơnam yua rĭm hrơi brơi kơ ƀing hlăk ai ngă kông nhơ̆n hăng mơnuih ƀon sang hăng anăn “Gum djru tơdruă, gum tơngan hrŏm pơgang hĭ klin”. Anai lĕ bruă mă ngă tui tơlơi jak iâu mơng Khua dêh čar ta amăng bruă gum tơngan hrŏm, pơdah pran thâo gum djru brơi ƀing hlăk ai ngă kông nhơ̆n hăng hơdôm sang anŏ glăk bưp tơnap tap yua klin Covid-19 ngă.

Jơlan hơdră hơmâo pok pơhai mơng lơ 15/7/2021-30/7/2022. Sit biă ñu, lơ̆m blơi gơnam yua rĭm hrơi amăng App blơi gơnam Mega1 ƀudah hơdôm anih hyu sĭ gơnam tui jơlan hơdră anai, kông nhơn, mơnuih ƀon sang amra hơmâo anom bơwih ƀong sĭ mơdrô gum hrŏm jơlan hơdră anai djru pơhrŏ trun nua gơnam dŏ 50% rĭm gơnam.

Ră anai jơlan hơdră hơmâo tơlơi gum djru, mut hrŏm mơng lu anom bơwih ƀong sĭ mơdrô amăng dêh čar ta. Ơi Nguyễn Ảnh Nhượng Tống - Khua khul git gai kông ti pơčruih ngăn grup Yeah1, lĕ anom bruă gum hrŏm brơi thâo, ră anai, jơlan hơdră glăk ba sĭ mơdrô gơnam yua rĭm hrơi hơmâo braih, ia tơsâo rơmô, ia mơsin, ia mơmuă…Laih dong, kiăng kơ gum tơngan hrŏm hăng djop khul grup, anom bơwih ƀong sĭ mơdrô, mơnuih ƀon sang bưp tơnap tap yua klin Covid-19. Kông ti pơčruih ngăn grup Yeah1 ăt hơmâo mông mă bruă hăng hơdôm sang măi pơkra pơjing gơnam tam blơi glăi gơnam pơkra nua kar hăng phrâo ba tơbiă mơng sang măi, mơng anun amra hrŏ nua brơi mơnuih ƀon sang blơi yua.

“Ƀing gơmơi hơmâo prap lui hơdôm anung gơnam blơi nua aset ƀiă kiăng kơ mơnuih ƀon sang rĭm blan kiăng kơnong mơng 100-200 rơbâo amra dưi blơi gơnam yua amăng ha blan, ƀing gơmơi ăt ba tơbiă lu tơlơi pơkă kiăng mơnuih ƀon sang blơi 1 anung gơnam hơmâo djop mơta pioh mă yua amăng ha blan. Ră anai bruă pơkra gơnam amăng blan dưi ba sĭ mơdrô 50 rơbâo anung gơnam combo, tui tơlơi pơkă amăng blan pơ anăp anai amra đĭ rơbêh 200 rơbâo anung gơnam, hăng amra jai hrơi lu tui dong”.     

Ơi Nguyễn Ngọc Dũng, Kơ-iăng khua khul mơnuih sĭ mơdrô điện tử Việt Nam brơi thâo: Khul amra gum hrŏm hăng jơlan hơdră anai hăng bruă pơƀut glăi lu anih anom sĭ mơdrô điện tử amăng dêh čar hăng mơng hơdôm anom bơwih ƀong sĭ mơdrô kiăng kơ ba hyu gơnam mơng anun hơdôm gơnam anai amra truh tơl mơnuih ƀon sang.

“Hrŏm hăng Khul sĭ mơdrô amăng plang điện tử amra djru brơi jơlan hơdră anai kiăng kơ ba gơnam truh tơl tơngan mơnuih ƀon sang tañ hloh, ră anai khul pơphun hơmâo pơƀut glăi lu anom bruă kiăng ngă hiưm pă akŏ pơjing grup wai lăng gơnam, pơkă hơđong nua sĭ gơnam laih dong ba nao tơl tơngan abih bang mơnuih, pơhlôm gơnam lêng kơ hiam klă ƀudah kiăng mơnuih ƀon sang thâo kơ bruă hrŏ trun nua blơi”.

Pok pơhai ƀơi 63 boh tơring čar, ƀôn prong amăng đơ đam dêh čar, samơ̆, jơlan hơdră anai đing nao pok pơhai ƀơi hơdôm tơring čar, ƀôn prong glăk bưp tơnap tap yua klin Covid-19. Sit biă ñu amăng blan 7,8,9, jơlan hơdră amra djru brơi ƀôn prong Hồ Chí Minh, Bình Dương hăng hơdôm tơring čar jum dar. Laih dong amra pok prong amăng hơdôm blan tŏ tui pơ anăp tui hluai tơlơi sit nik ră anai.

Ayong Ngô Văn Cương Khua khul hlăk ai mut phung đĭ pơhiăp amăng mông jơnum

Hlâo anun, kiăng kơ djru brơi neh met wa ngă hmua amuñ sĭ mơdrô gơnam tam, găn rơgao tơnap amăng hrơi blan hơmâo klin Covid-19, Khul hlăk ai rơnuk Hồ Chí Minh hơmâo pơphun jơlan hơdră “Pơlir hơbit blơi gơnam đang hmua - Gum djru tơdruă - Gum tơngan hrŏm pơgang hĭ klin”. Hơdôm anom bơwih ƀong sĭ mơdrô, djop anom bruă gum tơngan hrŏm ngă hơđong tơlơi hơdip kơ mơnuih ƀon sang, djru brơi mơnuih mă bruă găn rơgao tơnap yua klin Covid-19 ngă, laih dong pok pơhai tŭ yua hơdom tơlơi jak iâu “Mơnuih Việt Nam yua gơnam Việt Nam pơkra”.

Tui hăng Khua tal sa Khul hlăk ai rơnuk Hồ Chí Minh ơi Nguyễn Văn Tuấn, hăng bruă pơlir hơbit blơi gơnam hăng bruă sĭ gơnam tơl tơngan hăng amăng plang internet, Khul hlăk ai gum hrŏm hăng djop ding jum, djop khul grup hluai tui tơlơi gal, tơlơi dưi amăng bruă mă yua plang internet kiăng kơ djru blơi gơnam đang hmua mơng mơnuih ƀon sang tañ hloh amăng hrơi blan hơmâo klin anai:

“Ƀing gơmơi čang rơmang hăng pran thâo pơčeh phrâo anai amra tŏ tui dong pơ anăp anai, ƀu djơ̆ kơnong amăng bruă pơlir hơbit blơi gơnam đang hmua, gum djru tơdruă, gum tơngan hrŏm pơgang hĭ klin đôč ôh mơ̆ ăt kiăng pơgôp hrŏm hăng Ding jum ngă hmua hăng pơđĭ kyar ƀon lan ngă pơgiong bruă jao amăng pơplih phrâo hăng pơđĭ kyar ngă hmua pơ anăp anai”.

Hăng tơlơi jak iâu gum djru brơi hơdôm klăk boh sang anŏ Việt Nam mơng bruă pơhrŏ trun nua gơnam yua rĭm hrơi, jơlan hơdră ăt pơgôp ngă ha amăng plĕ anun lĕ pơgang klin rah, tŏ tui pơđĭ kyar bơwih ƀong sĭ mơdrô djru brơi mơnuih mă bruă, kông nhơ̆n ƀơi hơdôm sang măi pơkra gơnam yua rĭm hrơi dưi tŏ tui na nao bruă pơkra gơnam, huăi ngă rơngiă bruă yua bơbeč mơng klin Covid-19, pok prong dong amra pơgôp hơkrŭ glăi bruă pơkra gơnam yua, gơnam ƀong huă.

Siu Đoan: Pơblang