VOV4.Jarai - Čơtlăm lơ 10/12 ƀơi Hà Nội, Ding jum đang hmua hăng pơđĭ kyar ƀôn lan dêh čar ta gum hrom hăng “Glông bruă pơplih phrâo pơčeh phrâo bruă đang hmua prong hloh đơ đam rŏng lŏn tơnah” Xi-Gia (CGIAR) gum hrom pơphun jơnum lăng nao rai mơng ataih bơkơtuai hơdôm bruă pơđĭ tui bruă gum hrom anăp nao pơđĭ kyar bruă đang hmua kơjăp ƀơi Việt Nam. Pơhiăp amăng mông Jơnum, Kơ-iăng Khua Ding jum đang hmua hăng pơđĭ kyar ƀôn lang dêh čar ta ơi Lê Quốc Doanh pơsit, Việt Nam hmâo laih tơlơi đĭ kyar lăp djă pioh amăng hơdôm thun rơgao, biă ñu amăng pơđĭ kyar đang hmua. Thun 2020, khă bơdjơ̆ nao mơng klin Covid-19 samơ̆ bruă sĭ gơnam mă mơng đang hmua, akan hơdang ăt hmâo lu mơn 41 klai dolar Mi. Kơnong kơ blan 11 rơgao, gơnam mă mơng đang hmua akan hơdang sĭ kơ dêh čar tač rơngiao hmâo 43 klai dolar Mi, đĭ truh rơbêh kơ 14% bơhmu hăng thun hlâo hăng pơkă hlâo amra hmâo hăng hloh kơ tơhnal pơkă amăng sa thun. Kiăng yak mut rơwang pơđĭ kyar phrâo hăng lu tơlơi tơnap hăng tơlơi lông, Ding jum đang hmua hăng pơđĭ kyar ƀôn lan dêh čar ta hmâo čơkă mă dong tơlơi gum djru, lăng ba mơng ƀing gum djru, hơdôm khul grŭp jar kơmar, biă ñu lĕ hơdôm Khul grŭp kơsem min bruă đang hmua Xi-gia./.

Siu H’ Prăk: Pơblang