VOV4.Jarai-Hăng gru grua mơ̆ng đưm juăt hơmâo laih gum pơgôp, djru nao rai, khăp pap tơdruă mơ̆ng djuai ania, tơdơi kơ hmư̆ tơlơi jak iâu mơ̆ng Khua mir sir hăng Khua Jơnum min djop djuai ania mơnuih mơnam Việt Nam, lu sang bruă, anom bruă, khul grup mơnuih mơnam mut phung, mơnuih ƀôn sang pơdah rai bruă ngă glăm ba, tui hluai tơlơi gêh gal mơ̆ng ta pô, sang anŏ, djru hrom pơčruh prăk Keh prăk pơhlôm, pơgang Covid 19.

Anai lĕ gơnam phun prong biă mă pioh kơ Kơnuk kơna djru kơ ƀing ơi ia jrao, mơnuih mă bruă amăng sang ia jrao pơjrao mơnuih duăm ruă djơ̆ klin, kman pơ anih dŏ pơčlah phara ăt kah hăng rơnoh prăk pioh blơi vaccine pơgang tơlơi duăm ruă kơ mơnuih ƀôn sang dêh čar.

Anih tŭ jum hơdôm bruă ngă hiam pran jua čơmah nao pơčruh prăk pơhlôm pơgang Covid 19 ƀơi sang bruă Jơnum min djop djuai ania mơnuih mơnam Việt Nam hơdôm hrơi hăng anai pok bah amăng na nao čơkă lu khul grup, mơnuih ƀôn sang, ƀing ngă bruă sĭ mơdrô, ƀing pơdrong hơmâo pran jua čơmah nao djru hrom hăng Kơnuk kơna pơhlôm pơgang klin Covid 19.

Djă ba rơnoh prăk 131 klăk mơ̆ng Khul mơnuih djuai ania Việt Nam dŏ ƀơi Ma Cao, dêh čar Khač glăi pơ dêh čar djru hrom pơhlôm pơgang klin Covid 19, yă Nguyễn Thị Hương lăi, mơnuih ƀôn sang dŏ pơ dêh čar tač rơngiao ăt ĕp lăng na nao tơlơi pơhing klin kheng amăng dêh čar ta pô, čang rơmang rơnoh prăk djru pơčruh anai dưi truh pơ ƀing ơi ia jrao, nai ia jrao, ƀing hlăk dŏ mă bruă pơjrao mơnuih duăm ruă, ngă hrom pơtrut đuăi klin Covid:

“Ƀing gơmơi ngă hrom khua sang bruă pơ ala dêh čar Việt Nam hăng Khul mơnuih ƀôn sang Việt Nam dŏ ƀơi Ma Cao pioh pơphun mông jơnum abih bang mơnuih ƀôn sang hăng iâu pơthưr gum djru.  Ană plơi pla amăng dêh čar ngă tui hur har, yua dah tơlơi gum pơgôp djuai ania ƀing ta, ngă bruă hơgĕt, nao pơpă hai ăt anăp glăi kơ plơi pla pô. Yua kơ anun yơh, ƀing ta iâu pơthưr hăng ngă tui tŭ yua biă mă”.

Ngă tui tơlơi jak iâu mơ̆ng Khua mir sir ơi Nguyễn Xuân Phúc: lŏn ia ta kiăng biă mă tơlơi gum hrom pran jua mơ̆ng rĭm čô mơnuih. Hơdôm hrơi rơgao, lu sang bruă, anom bruă pơphun jak iâu pơčruh djop mơnuih mă bruă kơnuk kơna pơgôp sa hrơi prăk blan pioh djru hrom pơhlôm, pơgang klin.

Ƀơi Ding jum bruă čar, tơdơi kơ jak iâu hơmâo pơhrui glăi rơbêh 430 klăk prăk, abih bang rơnoh prăk anai hơmâo mơ-it nao pơ Keh prăk pơhlôm pơgang Covid 19 pioh gum hrom ngă tui hơdră pơhlôm pơgang klin. Khua sang bruă kơ Ding jum bruă čar, ơi Vũ Đăng Minh brơi thâo:

“Abih bang mơnuih apăn bruă amăng Ding jum bruă čar ngă tui sa amăng plĕ. Khua mua, mơnuih apăn bruă Ding jum bruă čar čang rơmang ƀing ta hơmâo hơdră pơhlôm pơgang klin kheng tañ hơđong tơlơi pơđĭ kyar lŏn ia.

Ngă hiư̆m pă pơgăn klin tañ. Samơ̆ rơnoh prăk anai ƀiă kiăng pơgôp hrom tuh pơ alin, djru hmao kru kơ ƀing nai ia jrao, mơnuih mă bruă amăng gơnong bruă ia jrao hlăk dŏ pơgang klin ƀudah pơjrao mơnuih duăm ruă djơ̆ klin. Yua adai pơ-iă h’uh ƀing nai ia jrao mă bruă tơnap tap biă mă”.

Jao rơnoh prăk 300 klăk  kơ jơnum min djop djuai ania mơnuih mơnam Việt Nam, Kơ-iăng Khua Gong phun jua pơhiăp Việt Nam, ơi Vũ Hải Quang brơi thâo, rĭm čô mơnuih mă bruă, ƀing čih tơlơi pơhing, ƀing adoh suang mơ̆ng Gong phun jua pơhiăp Việt Nam pơčruh hơmâo 300 klăk prăk kiăng pơgôp hrom ƀiă hrom hăng Ping gah, Kơnuk kơna, lŏn ia pơgăn tơlơi ƀă hyu klin kheng amăng plơi pla. Hrom hăng anun, bruă pơčruh prăk hrơi blan rơgao, Gong phun jua pơhiăp Việt Nam hơmâo ngă hur har pơtô pơblang kơ bruă pơgang klin:

“Hăng sa boh anom bruă pôr tơlơi pơhing prong mơ̆ng Ping gah, kơnuk kơna, ƀing gơmơi ăt pioh lu mông pôr tơlơi pơhing hăng bruă mă pơhlôm, pơgang klin Covid. Mơ-it nao ƀing čih tơlơi pơhing nao pơ anih hơmâo klin, pơtô pơblang bruă mă git gai mơ̆ng Ping gah hăng kơnuk kơna.

Bruă ngă tui dua bruă sa amăng plĕ, pơgang klin rah pơtrut bơwih ƀong huă pơđĭ kyar; bơni kơ gru mă bruă hiam ăt kah hăng tơlơi gir run mơ̆ng ƀing tơhan, mơnuih mă bruă dŏ pơ anih pơgăn klin mă bruă tơnap tap, tuh rơyuh pran jua kơ tơlơi hơdip mơda pô”.

Amăng hrơi blan tơnap tap hloh jing mông gêh găl pioh kơ rĭm čô ƀing ta pơdah rai tơlơi gum pơgôp,  ngă hrom hăng glăm ba yua kơ lŏn ia, yua kơ ană plơi. Lu mơnuih ngă bruă sĭ mơdrô, laih anun mơnuih ƀôn sang hơmâo pơdah đĭ tơlơi gum pơgôp, djru nao rai khăp pap, lăng kơ pô pơkŏn kah hăng drơi jăn pô, hla lôm gôm ba hla tơ̆i.

Khua mua pơ ala djop sang bruă sĭ mơdrô hăng mơnuih ƀôn sang djru lăi: Kâo pơmin lĕ, tơlơi djru nao rai sit nik anun jing pran jua ta pô kiăng. Mơ̆ng pran jua kiăng sit nik djru rĭm mơnuih djuai ania Việt. Glăm ba hăng bruă rong ngă, pơyơr pran jua, ƀuh rơđah hơdôm ƀing gơgrong biă mă gum tơngan hrom kơnuk kơna, hrom ană plơi pla”.

Lăi pơtong amra mă yua rơnoh prăk djru tơpă, pơhaih rơđah rơđong hăng tŭ yua mơ̆ lu mơnuih sĭ mơdrô, ƀing mơnuih hơmâo pran jua čơmah djru kơ Keh prăk pơhlôm, pơgang klin Covid 19, Kơ-iăng Khua Jơnum min djop djuai ania mơnuih mơnam Việt Nam, yă Trương Thị Ngọc Ánh brơi thâo:

Anai lĕ gơnam djru yôm biă mă pioh blơi ia jrao vaccine tlâ̆o pơgang brơi kơ ană plơi pla amăng dêh čar, pioh djru kơ ƀing nai ia jrao, ling tơhan, mơnuih dŏ mă bruă pơgang klin hăng ƀing dŏ mă bruă amăng anih brơi dŏ pơčlah phara, blơi gơnam yua gah ia jrao, bơwih brơi kơ bruă pơhlôm, pơgang klin Covid 19:

“Hăng rơnoh prăk djru anai mơ̆ng Gơnong dlông, ƀing gơmơi ngă hrom Khua mua git gai mơ̆ng dêh čar pơhlôm pơgang klin Covid 19 pioh ngă bruă wai lăng, mă yua prăk pơhlôm, pơgang klin Covid 19 djơ̆ hơdră, mă yua prăk mơ̆ng djop sang sĭ mơdrô, mơnuih ƀôn sang hơmâo pran jua čơmah, kiăng mă yua djơ̆ hơdră, mă yua rơnoh prăk jak iâu pơčruh djơ̆ bruă kiăng".

Tơlơi kơtang mơ̆ng pran jua gum pơgôp, sa pran jua, abih bang mơnuih ƀôn sang pơgang klin, lu khul mơnuih ngă bruă sĭ mơdrô, sang bruă mơnuih tơpuôl, ană plơi pla nao pơčruh prăk ƀơi sang bruă Khua jơnum min djop djuai ania mơnuih mơnam Việt Nam hơdôm hrơi anai brơi ƀuh tơlơi gum pơgôp djuai ania, gru grua hiam ƀu djơ̆ kơnong boh pia, tơlơi pơhiăp đôč đač ôh, jing pran jua ai hơtai djru nao rai yôm pơphăn biă mă. Bruă ngă anun jai amăng mông tơnap tap hloh, jai bơngač tui tơlơi khin hơtai hăng tơlơi pơmin ană mơnuih dêh čar Việt Nam.

Nay Jek: Pơblang