VOV4.Jarai-Tơdơi kơ ƀôn prong Hà Nội phru hĭ bruă sĭ mơdrô ăt kah hăng bruă đuăi hyu pơtop rơjang drơi jăn pơ rơngiao, ƀu ƀiă ôh mơnuih ƀôn sang, pô sang bruă sĭ mơdrô ngă amưng ƀu kơđiăng kơ klin, tơlơi anun hŭi biă mă klin hơđuh rai. Bruă ngă anai, ƀôn prong Hà Nội pơtrun hiăp djop tơring glông, plơi prong khom ƀư̆ pơkra glăi mơtam, laih dơ̆ng amra ngă kơđi khŏp hlơi pô ngă soh glăi.

Ĕp lăng bruă ngă tui djơ̆ tơlơi phiăn pơtrun mơ̆ng ƀôn prong kơ bruă pơgang klin ƀơi djop tơring glông, plơi prong. Ơi Chữ Xuân Dũng, Kơ-iăng Khua Jơnum min mơnuih ƀôn sang ƀôn prong Hà Nội brơi thâo, ăt dŏ hơmâo mơnuih ƀôn sang ngă amưng bruă pơgang klin, hơmâo anih đa lăng ƀu yôm ôh bruă pơhlôm pơgang klin; ngă ƀu djơ̆ tơlơi pơtrun brơi dŏ ataih tơdruă, laih dơ̆ng bruă brơi krư̆ bah amăng sang sĭ mơdrô  tui mông pơkă.

Khua Jơnum min mơnuih ƀôn sang ƀôn prong Hà Nội pơtrun hiăp kông an, Khua djop Jơnum min mơnuih ƀôn sang tơring glông, plơi prong, brơi git gai, hyu ĕp lăng, ngă kjăp tơlơi gơgrong mă bruă tơpă; pơsir khut khăt hlơi pô ngă soh glăi.

Nay Jek: Pơblang