VOV4.Jarai-Mơguah lơ 4/8, Kơ-iăng Khua dêh čar ơi Vũ Đức Đam, Khua khul git gai pơgang klin Covid 19 dêh čar phrâo mă bruă hăng Gơnong bruă git gai pơhlôm, pơgang klin Hà Nội đĭ pơhiăp amăng mông jơnum, Kơ-iăng khua dêh čar ơi Vũ Đức Đam lăi, Hà Nội jing anih amuñ biă mă klin ƀă.

Hrơi blan rơgao, abih anom bruă kơđi čar hăng mơnuih ƀôn sang Hà Nội hơmâo lu tơlơi gir run laih, pơgăn klin duăm ruă. Ƀôn prong Hà Nội hơmâo tơlơi pơtrun djơ̆, thâo pơčeh phrâo ngă tui hơdră pơhlôm, pơgang klin. Kơ-iăng Khua dêh čar brơi thâo, Khul git gai mơ̆ng dêh čar pơhlôm, pơgang klin Covid 19 hăng Hà Nội hơmâo tơlơi hơdai gum hrom djơ̆ rơ-ua.

Kơnang kơ tơlơi pơhing ƀuh, pơblang tong ten hơdră bong glăi hmar, lăi pơthâo tơlơi hŭi ƀă klin, Khul git gai, amăng anun Kơ-iăng Khua dêh čar pô apăn akŏ Khul hơmâo jơnum pơčrông sai hăng khua mua ƀôn prong Hà Nội, lăi pơthâo hăng Khua dêh čar kiăng tŭ ư hơdră pok pơhai ngă tui Hră pơčrâo mrô 16/CT-TTg mơ̆ng Khua dêh čar pơtrun.

Nay Jek: Pơblang