VOV4.Jarai-Tui hăng Anom bruă mơnuih tơpuôl Hà Nội, yap truh abih lơ 20/5, hơmâo 296/296 grup mơnuih tơpuôl mơ̆ng anom bruă sĭ mơdrô akŏ pơjing anăn “Grup rơnuk rơnua Covid 19” hăng rơbê 7 rơbâo 800 čô mơnuih ngă hrom. Tơdơi kơ 5 hrơi pok pơhai, abih bang mơnuih ngă bruă wai lăng mơnuih mut phung amăng djop anih tuh tia pơkra ming hăng pơjing gơnam sĭ mơdrô ƀơi Hà Nội mut hrom, pơtô brơi kơ ƀing ngă khua mơnuih tơpuôl pơyŭ ngă hrom khua mua sang bruă sĭ mơdrô akŏ pơjing “Grup rơnuk rơnua Covid 19”.

Abih bang djop grup pơkra hơdră pioh bong glăi klin kheng, anăm lui dŏ kơtuă oh sit hơmâo klin truh. Rĭm hrơi, Grup rơnuk rơnua Covid 19 amăng sang bruă sĭ mơdrô hyu pơtô pơblang, pôr pơthâo, pơtrut pơsur, pơtô brơi, pơtă pơtăn mơnuih mă bruă ngă kông ñơn ngă tui khut khăt tơlơi pơtrun pơhlôm, pơgang klin ƀơi anih dŏ mă bruă hăng gah rơngiao kơ mông mă bruă, boh nik ñu ngă tui klă pơkă lăng anŏ hlor amăng drơi jăn, khom truă bơnal gôm ƀô̆, dŏ ataih tơdruă, pơhaih bruă ia jrao tơpă sit nik.

Nay Jek: Pơblang