VOV4.Jarai - Thun 2022, rơngiao kơ nua gơnam ƀu hơđong ƀơi rŏng lŏn tơnah, nua gơnam pơmă đơi amăng dêh čar ăt yua mơng bruă pơplih nua apah prăk bruă bơwih brơi, sa dua mơta gơnam pơkra, blơi mut pơmă, nua ia săng ia jâo đĭ trun dong...tơlơi pơhing lăp đing nao ƀơi mông Jơnum pơčrông sai bruă sĭ mơdrô, nua gơnam ƀơi Việt Nam thun 2021 hăng him lăng hlâo amăng thun 2022. Thun 2022, Việt Nam amra rŭ glăi hăng pơđĭ kyar kơtang, mrô pơđĭ nua gơnam ča čot amăng thun 2022 huăi bơngơ̆t đơi lơi. Tui anun, mơta sa lĕ amăng thun 2022, tơlơi bơwih ƀong ƀơi rŏng lŏn tơnah pơđĭ kyar kaih, tơlơi bơwih ƀong ƀơi Việt Nam ta hai hnun mơn, năng ai mơng 6 truh 6,5% lĕ mrô pơđĭ mă nua gơnam năng ai 2,8 truh 3,2%. Tơdah tui tơlơi him lăng tơlơi bơwih ƀong ƀơi rŏng lŏn tơnah đĭ klă hloh lĕ tơlơi bơwih ƀong dêh čar Việt Nam amra đĭ klă mơn, laih anun tơdah ƀing ta ăt mă yua tơlơi gêh gal mơng hră pơkôl sĭ mơdrô rơngai lĕ ƀing ta amra hơmâo rơnoh đĭ kyar mơng 7 truh 7,5% amăng thun 2022 laih anun mrô pơđĭ mă nua gơnam ča čot năng ai mơng 3,5 truh 3,8%.

Siu H’Mai: Pơblang