VOV4.Jarai - Amăng 6 blan akŏ thun, hlăk ai Daklak hơmâo ngă tui rơbêh 13 rơbâo rĭng bruă, bruă jao kơ hlăk ai, pơgôp amăng man pơdong plơi pla phrâo, djru brơi djop plơi pla tơnap tap amăng tơring čar. Sit biă ñu, amăng 6 blan laih rơgao, đơ đam tơring čar hơmâo pla phrâo giăm 41 rơbâo phun kyâo, man pơdong 47 anih jơnum pơƀut, ngui ngor brơi hlăk ai čơđai anet amăng djop să, phường, tơring kual. Pơphun ngă giăm 200 ring bruă brơi čơđai hăng djru rơbêh 37 rơbâo čô čơđai sang anŏ tơnap tap. Man pơkra 5 hơbô̆ bruă, hơdră djru hlăk ai tơnap tap, drơi jăn ƀu klă hiam, djru brơi 53 akŏ bruă pơphun bruă mă mơng hlăk ai hăng djru čan prăk giăm 48 klai prăk brơi hlăk ai pơđĭ kyar bơwih ƀong huă.

Hlăk ai Daklak hơmâo lu tơlơi pơplih phrâo lơ̆m pok pơhai bruă mă

Tui hăng tơlơi pơsit mơng Khul apăn bruă Ping gah tơring čar Daklak, amăng 6 blan laih rơgao, mah bơbeč nao kơtang mơng klin Covid-19 ngă kơ djop bruă pok pơhai tơnap tap, lu bruă khŏm pơdơi hĭ. Samơ̆ lu bruă ăt pok pơhai ha amăng plĕ, lu khul grup ƀơi ƀon lan hơmâo lu tơlơi gơgrong, hơdeč hmar lơ̆m ngă tui hơdôm hơnong pơkă, pơhlôm pơgiong bruă jao, laih dong pơpha mơnuih djru amăng bruă pơgang klin.

Siu Đoan: Pơblang