VOV4.Jarai - Amăng hơdôm hrơi rơgao, ƀơi tơring čar Daklak rim hrơi čih mơnuih phrâo ƀă kơman. Hăng pran jua “ƀơi hơpă kiăng ƀơi anun hmâo hlăk ai”, hơdôm khul grŭp hlăk ai tơdăm dra plơi prong Buôn Ma Thuột, tơring čar Daklak, glăk hrơi mlăm djru pran gum hrom hơdôm khul grŭp pơpkon djru pơgăn klin Covid-19. Grŭp amăng bruă Hlăk ai tơring čar Daklak hmâo črâo ba hơdôm gưl Khul djă pioh dong bruă mă mơng 270 grŭp djru pơgang, pơgăn klin Covid-19.

Ƀơi anih dô̆ gak gah dơnung plơi prong Buôn Ma Thuột, anih wai lăng klin ruă ƀơi tơdrông toa 14, jơlan Hồ Chí Minh (Jơlan mrô 14 črăn găn să Hoà Phú) rim hrơi mlăm čơkă hơdôm rơbâo wot čô mơnuih mut ngă hră lăi pơthâo tơlơi suaih pral. Hrom hăng hơdôm khul grŭp pơkon, hơdôm mơnuih mơng khul hlăk ai tơdăm dra gum djru bruă dô̆ gak, pơtô brơi jơlan nao, djru mơnuih ƀôn sang ngă hră lăi pơthâo hăng pơmut tơlơi lăi pơthâo. Ayong Y Phong Êban, Khua git gai Khul hlăk ai să Hoà Phú, plơi prong Buôn Ma Thuột brơi thâo.

“Khul hlăk ai mơng să gum hrom mơng čơtlăm lơ 31/5 lom pơphun hmâo anih dô̆ gak wai lăng klin ruă ƀơi jơlan mrô 14 pơ̆ să. Tơdơi kơ tal klin ngă phrâo anai gluh đĭ ƀơi plơi prong Buôn Ma Thuột ăt hmâo rơkâo mơn Khul hlăk ai plơi prong iâu nao dong sa dua čô mơnuih hlăk ai ƀơi hơdôm khul grŭp mơng ƀut mrô 1. Ră anai rim anom hmâo 3 čô mơnuih rai pơ̆ anai, kơnong kơ khul hlăk ai să mơng 2 truh kơ 3 čô mơnuih sa rowang mông gak. Gum hrom ƀơi anai giong ƀing gơñu rŏng dô̆ čơlah mă pơ̆ sang pô”.

Khul hlăk ai tơdăm dra gum dô̆ gak ƀơi anih gak wai lăng klin tơdrông toa 14

Hrom hăng hlăk ai plơi pla, ƀơi anih dô̆ gak tơdrông toa 14 dô̆ hmâo 8 čô mơnuih tơdăm dra rơkâo gum djru mơng plơi prong Buôn Ma Thuột nao, Amai Trần Thị Huyền Thương, hlăk ai mơng Sang hră Cao đẳng Công nghệ Tây Nguyên, lăi pơthâo:

“Yua kơ mơnuih luh glăi wot tơhrơi hăng mlăm rim hrơi, anun ƀing gơyut khom mă bruă wot tơhrơi hăng mlăm hăng khom pơpha mông dô̆ gak. Bruă dŏ dŏng ƀong huă, đih pit mơng ƀing gơyut kah hăng tum pơƀŭt ƀơi anai hlao. Ăt gêh gal mơn, samơ̆ hăng pran jua hlăk ai hur har pran jua lĕ ƀing gơmơi ăt kiăng gir run ha pran jua mơn hăng gum tơngan hrom gong gai, hrom hăng kơnuk kơna gum pran hrom kơdŏng klin hăng čang rơmang ƀing ta amra dưi pơgăn klin”.

Ră anai, abih bang 21 bôh să, phường mơng plơi prong Buôn Ma Thuột leng kơ pơphun glăi grŭp hlăk ai tơdăm dra ba jơlan hlâo, hyu lăi pơhing bruă pơgang, pơgăn klin kơ mơnuih ƀôn sang, djru dô̆ gak ƀơi kual guang dar, anih wai lăng klin ƀơi hơdôm ară jơlan, hăng tŭ mă, pơpha gơnam kiăng yua djru mơnuih ƀôn sang hăng hơdôm khul kual hmâo guang dar… Amai Nguyễn Tuyết Sinh, Kơ-iăng Khua git gai Khul hlăk ai phường Thành Công, plơi prong Buôn Ma Thuột, Daklak brơi thâo:

“Ƀing gơmơi ăt kiăng lar hyu mơn sa tơlơi lĕ ră anai klin ruă ngă tơnap biă anun ƀing gơyut hlăk ai tơdăm dra ƀơi plơi prong hmâo pran jua gum hrom djru ba kiăng mut hrom grŭp hlăk ai ba jơlan hlâo mơng plơi prong, lom mơ̆ plơi prong hmâo iâu pơƀŭt lĕ ta amra dưi gum hrom klă hloh”.

Khul hlăk ai tơdăm dra tŭ mă hăng pơpha hyu gơnam kiăng yua kơ hơdôm kual guang dar

Tui hăng amai H Hương Ƀuôn Krông, Kơ-iăng Khua Khul hlăk ai plơi prong Buôn Ma Thuột, amăng tơlơi klin ruă ngă glêh tơnap, mơng rơnuč blan 5 truh ră anai, Khul hlăk ai plơi prong Buôn Ma Thuột ăt iâu pơthưr gum hơgôp mơn gơnam kiăng yua kơ mơnuih ƀôn sang amăng hơdôm hrơi dô̆ čơlah, guang dar hăng pơsur hơdôm khul grŭp glăk mă bruă. Hrom hăng tơlơi pran jua anăp nao “pơgăn klin kah hăng pơgăn ayăt”, hlăk ai plơi prong Buôn Ma Thuột hmâo ngă tui bruă ba jơlan hlâo, gum djru, hrơi mlăm gum hrom gong gai hăng hơdôm khul apăn bruă kiăng ngă tui bruă pel ĕp, hyu huĕt ĕp, čơlah, guang dar pơgăn klin ăt kah hăng lăi pơhing, pơsur mơnuih ƀôn sang ngă tui tơpă hơdôm bruă pơgang, pơgăn klin.

“Pơ̆ anăp anai Grŭp apăn bruă Khul hlăk ai ăt kah hăng Khul pơlir hơbit hlăk ai Việt Nam plơi prong amra pok pơhai hơdôm grŭp gum djru. Sa lĕ iâu pơthưr pơsur hơdôm grŭp hlăk ai rơkâo djru ƀơi anih dô̆ gak Hoà Phú, iâu pơƀŭt mơnuih amăng khul hlăk ai tơdăm dra hăng čơđai muai ƀuh ƀô̆ amăng hơdôm kual guang dar mơnuih ƀôn sang ƀơi plơi prong, jŭ yap kiăng pơsur djru gum. Dua lĕ iâu pơthưr kiăng pơsur pơdŏng glăi “Anih tơnă hơbai mlăm”. Tal klin ngă thun 2020, khul hmâo pơjing laih anih tơnă hơbai anai ăt ngă tui ba glăi mơn bôh tơhnal amăng bruă djru tơnă hơbai kơ khul ƀơi hơdôm anih guang dar ƀơi plơi prong”.

Gum ngă hăng hlăk ai plơi prong Buôn Ma Thuột, phrâo anai, Khul hlăk ai Kông ang tơring čar Daklak gum hrom hăng Hlăk ai plơi prong Buôn Ma Thuột hrom hăng hơdôm mơnuih thâo tơngia pơphun hyu čuă, pơsur hăng ƀơk brơi hơdôm rơbâo get ia, hơdôm pluh kơthung mì tôm, hơdôm rơtuh bôh mơnŭ bip hăng gơnam pơgang adung mơbah pioh pơgang klin kơ khul mă bruă pơgang pơgăn klin ƀơi 4 anih dô̆ gak pơ̆ să Hoà Phú, Čư̆ Êƀur, anih dô̆ čơlah hơbit ƀơi anih dô̆ čơđai Sang hră Cao đẳng dô̆, jơlan añep Hà Huy Tập hăng Kông ang phường Tân An, plơi prong Buôn Ma Thuột.

Ƀơi anăp tơlơi ngă glêh tơnap mơng klin Covid-19, Grŭp apăn bruă hlăk ai tơring čar Daklak hmâo črâo ba hơdôm gưl Khul hlăk ai djă pioh dong bruă mă mơng 270 grŭp djru pơgang pơgăn klin Covid-19; ngă tui tơlơi črâo ba mơng Jơnum min mơnuih ƀôn sang tơring čar Daklak amăng bruă pơgang pơgăn klin kheng. Amăng anun, đing nao pơtrut kơtang bruă lăi pơhing pơsur mơnuih ƀôn sang ngă tui bruă pơgang klin hăng bruă ƀơk brơi bơnah gôm adung mơbah, ia rao tơngan kơ kual dô̆ čơlah, anih lu mơnuih jưh; djru prăk, gơnam tam kiăng yua kơ mơnuih apăn bruă tơhan, ling tơhan hăng hơdôm mơnuih dô̆ ƀơi kual čơlah; djru mơnuih ƀôn sang lăi pơthâo tơlơi suaih pral, pha brơi hră lăi pơhing, djru lăi pơthâo tơlơi suaih pral, hơđong rơnuk rơnua ƀơi hơdôm anih dô̆ gak wai lăng klin./.

            H’ Xíu: Pô čih – Siu H’ Prăk: Pô pơblang