VOV4.Jarai - Ƀơi tơring glông Ea H’leo, tơring čar Daklak, gơnong bruă pơtô pơjuăt hơmâo pok pơhai hơdôm hơdră pơtô hrăm ƀơi sang hră hăng pơtô hrăm lăng nao rai mơng ataih kiăng pơhlôm brơi djơ̆ hrơi blan pơkă mah klin Covid-19 dŏ ngă tơnap tap.

Rơbêh ha wŏt hrơi tơjuh anai, tơdơi kơ klin Covid-19 dưi pơgang hĭ, Sang hră gưl sa Ea H’leo, tơring glông Ea H’leo hơmâo pơphun brơi ƀing čơđai pơwŏt glăi nao sang hră mơtăm. Nai pơtô Nguyễn Văn Tân, Khua sang hră brơi thâo, ră anai sang hră hơmâo 16 anih pơtô hăng 523 čô čơđai, amăng anun čơđai djuai anai ƀiă 216 čô.

“Kiăng kơ pơhlôm rơnuk rơnua lơ̆m pơtô brơi ƀing čơđai, sang hră ăt hơmâo pơphô bruă brơi djop gưl, pơphun pruih ia jrao, rơmet agaih jum dar, prap lui get ia jrao rao tơngan. Sang hră pơphun pơčlah hrăm brơi kơ ƀiă mơnuih samơ̆ pơhlôm 30 čô amăng anih hrăm. Sang hră hơmâo pơphô bruă brơi djop gưl tlâ̆o brơi djop ia jrao kơ ƀing mơnuih apăn bruă, mơnuih mă bruă. Bơ ƀing čơđai aka ƀu dưi nao sang hră yua glăk pơčlah pioh pơgang klin, sang hră ăt hơmâo hơdră pơtô hrăm phara mơ̆n”.

Amon Nguyễn Phạm Bảo An, čơđai hrăm anih 5A, sang hră gưl sa Ea H’leo hok mơ-ak yua kơ dưi pơwŏt glăi nao sang hră tơdơi kơ sui hrơi pơčlah yua kơ klin kheng.

“Lơ̆m kâo pơwŏt glăi nao sang hră kâo hok mơ-ak biă mă yua kơ dưi bưp glăi gơyut gơyâo hăng nai pơtô. Lơ̆m kâo hrăm pơ sang tơdah hơmâo tơlơi tơnap tap ƀu thâo tơña hlơi ôh mơ̆ kơnong čih mơ-it nao kơ nai pơtô amăng zalo đôč. Bơ lơ̆m hrăm pơ sang hră kâo dưi tơña hlao ƀơi anăp mơtăm”.

Sang hră gưl sa Ea H’leo brơi čơđai pơwŏt glăi nao sang hră

Hluai tui tơlơi sit nik pơtô hrăm pơ sang hră hăng lăng nao rai mơng ataih, jao tơlơi hrăm pơ sang brơi ƀing čơđai … hluai tui klin kheng hơmâo lu sang hră ƀơi tơring glông Ea H’leo, tơring čar Daklak pơphun lăp djơ̆ hloh. Nai Nguyễn Thị Minh Trường, Kơ-iăng khua sang hră gưl sa Ea Khăl brơi thâo: Kiăng kơ bruă pơtô hrăm lăng nao rai mơng ataih klă hloh, sang hră hơmâo đing nao ngă klă glông internet, pơjing jơlan hơdră pơtô hrăm lăp djơ̆, ƀing nai pơtô pơplih amăng bruă pơtô, đing nao hơdôm boh tơhnal phun kiăng kơ abih bang ƀing čơđai lêng kơ tañ hloh. Giăm 500 čô čơđai, amăng anun hơmâo 210 čô lĕ djuai ania ƀiă glăk hrăm ƀơi sang hră gưl sa Ea Khăl, să Ea Khăl, tơring glông Ea H’leo glăk hrăm lăng nao rai mơng ataih.

“Sang hră ăt pơphun pơtô hrăm lăng nao rai mơng ataih brơi kơ lu čơđai, ƀing čơđai giăm sang dưi mut hrăm sa anih lăng nao rai, dua čô sa boh măi, ƀudah 3 čô sa boh măi. Ƀing čơđai ƀu hơmâo măi, ƀing gơmơi jao tơlơi hrăm tơl anih. Đa hơmâo čơđai hơmâo mơnuih amăng sang anŏ glăi mơng kual pơkŏn yua anun ƀing gơñu ƀu dưi nao sang hră, ƀu dưi nao pơ sang gơyut gơyâo hrăm hrŏm, ƀing nai pơtô amra nao tơl sang jao tơlơi hrăm. Ƀing čơđai ƀơi hơdôm anih pơčlah pơƀut, tơdah ƀing nai pơtô ƀu dưi nao tơl anih amra jao brơi gong gai ƀon lan, grup pơgang klin Covid-19 djru brơi”.

Lơ̆m brơi čơđai pơwŏt glăi nao sang hră, djop sang hră pơhlôm bruă pơgang klin

Tơring glông Ea H’leo ră anai hơmâo 67 boh sang hră hăng rơbêh kơ 29.000 čô čơđai mơng sang hră čơđai anet truh pơ gưl tlâo. Ơi Phạm Văn Đảng, Khua anom bruă pơtô pơjuăt tơring glông Ea H’leo brơi thâo: Yua klin dŏ ngă tơnap tap, đơ đam tơring glông phrâo hơmâo ha mơkrah čô čơđai hơdai hrăm lăng nao rai mơng ataih. Bruă pơgang klin lêng kơ hơmâo djop sang hră ngă tui klă hloh. Djop sang hră pơphun pel ĕp na nao, jŭ yap glăi ƀing čơđai hơmâo mơnuih glăi mơng kual hơmâo klin glăk pơčlah pơgang klin pơ sang, hơmâo hơdră pơtô hrăm brơi lăp djơ̆ mơn.

“Gah anom bruă pơtô pơjuăt hơmâo hră pơ-ar git gai djop sang hră pơjing jơlan hơdră pơtô hrăm. Hăng rĭm čô nai pơtô kiăng kơ hơmâo jơlan hơdră pơtô hrăm brơi kơ ƀing čơđai, amăng anun đing nao ngă klă hloh lơ̆m pơtô brơi rĭm čô čơđai. Mah lăng nao rai mơng ataih tŭ mơn khŏm đing nao pơtô brơi klăk hloh, hrăm hơdôm hơƀơ̆i đing nao pel ĕp ƀơi anun. Lơ̆m ƀing čơđai pơwŏt glăi nao sang hră kiăng pơtô lok glăi hơdôm tơlơi hrăm mơ̆ hlâo anun pơtô lăng nao rai mơng ataih kiăng pơhlôm klă hloh. Lơ̆m hơmâo mơnuih F0 amăng kual anun kiăng hơdai nao hrăm mă pơ sang, lăng nao rai mơng ataih, jao tơlơi hrăm pơ sang. Bơ truh pơgang hĭ klin laih dưi pơhlôm rơnuk rơnua, pơphun pơtô hrăm gal hloh, khul git gai mơng să, Khua sang hră lăi pơthâo brơi ƀing čơđai nao sang hră”.

Truh ră anai, ƀơi tơring glông Ea H’leo nai pơtô hăng ƀing čơđai thâo krăn nao rai laih bruă pơplih pơtô hrăm ăt pơphun klă hloh. Bruă prap lui pơtô lăng nao rai mơng ataih ƀudah hrăm pơ sang hră pơphun lăp djơ̆ mơn, huăi hơmâo tơlơi tơnap pơpă ôh djru brơi ƀing čơđai hmao jơlan hơdră pơtô hrăm.

Siu Đoan: Pơblang