VOV4.Jarai - Ngă lơphet 110 thun Hrơi Wa Hồ ĕp jơlan pơklaih rơngai lŏn ia (lơ 5/6) hăng 80 thun Hrơi Ñu glăi pơ dêh čar git gai bruă hơkrŭ lŏn ia Việt Nam (lơ 28/1), mơguah tom brơi lơ 26/5 ƀơi Hà Nội, Sang hră kơđi čar Dêh čar Hồ Chí Minh ngă hrŏm hăng Anom pơtô bruă Ping gah, Ping gah ƀon prong Hồ Chí Minh hăng Ping gah tơring čar Cao Bằng pơphun jơnum boh thâo gưl dêh čar hăng akŏ bruă “Hồ Chí Minh hăng hrơi blan tơgŭ hơkrŭ rơngai djuai ania hăng chủ nghĩa xã hội”.

Pơhiăp ƀơi mông jơnum, ơi Nguyễn Xuân Thắng - Khua Sang hră Kơđi čar Dêh čar Hồ Chí Minh, Khua Khul Lý luận Trung ương lăi, tơlơi kơtưn Dưi wai lăng mă hơjăn - Rơngai - Yâo mơ-ak, tơlơi ba glăi mơng bruă hơkrŭ mơ̆ Khua mir sir Hồ Chí Minh pơjing rai, tơlơi yôm mơng tơlơi pơmin mơ̆ Ñu pioh glăi hơmâo nua yôm biă, ba jơlan hơdôm tơlơi truh kih mơng bruă hơkrŭ lŏn ia Việt Nam, amăng anun hơmâo lu tơlơi dưi ngă prong, yôm biă mă mơng 35 thun pơplih phrâo, tơlơi mơ̆ lu wơ̆t Khua git gai Ping gah Nguyễn Phú Trọng pơsit, lŏn ia ta aka ƀu hơmâo djơ̆ ôh tơlơi rơgơi, tơlơi kơdrưh kơang ƀơi jar kmar tui hăng hrơi anai.

Siu H’Mai: Pơblang