VOV4.Jarai - Rơwang hrơi tơjuh rơgao, Jơnum min djŏp djuai ania mơnuih mơnam Việt Nam djŏp tơring čar amăng kual Dap Kơdư ngă giong laih bruă Jơnum pơčrông sai ruah khua tal 3, čih anăn ƀing dưi tơbiă anăn ba ruah ngă khua pơ ala mơnuih ƀon sang dêh čar tal 15 hăng Khua Jơnum min pơ ala mơnuih ƀon sang djŏp gưl rơwang thun 2021-2026. Bruă prăp rơmet kơ hrơi plĕ hră ruah glăk hơmâo hơdôm tơring čar ngă tui djơ̆ hăng tơlơi phiăn.

Ƀơi mông jơnum pơčrông sai bruă ruah khua tal 3 mơng tơring Gia Lai, tơdơi kơ pơčrông sai giong, hơmâo 100% mrô khua tŭ ư čih anăn 10 čô khua dưi tơbiă anăn ba ruah ngă Khua pơ ala mơnuih ƀon sang dêh čar tal 15. Mông jơnum tŭ ư brơi 3 čô khua rơkâo lui hĭ čih anăn ba ruah. Mông jơnum jing kơđŏm laih hră čih anăn 119 čô khua tơbiă anăn ba ruah ngă Khua Jơnum min pơ ala mơnuih ƀon sang tơring čar Gia Lai tal 12, rơwang thun 2021-2026. Tui hăng yă Rčom H’Déo, ding kơna Jơnum min ruah khua tơring čar Gia Lai, ƀing rơkâo tơbiă hĭ čih anăn ba ruah ngă Khua pơ ala mơnuih ƀon sang dêh čar tal 15 lĕ rơkâo mă pô, huăi bơbjơ̆ nao bruă dưm dăp mrô mơnuih tơbiă anăn ba ruah ngă Khua pơ ala mơnuih ƀon sang dêh čar tal 15 ôh.

“Mơng mông jơnum pơčrông sai bruă ruah khua tal 3 anai, kâo lăng hơmâo 3 čô rơkâo lui hĭ hơmâo anăn ba ruah ngă Khua pơ ala mơnuih ƀon sang dêh čar tal 15 anai, mơng bruă mông jơnum pơčrông sai hăng mă tơlơi pơgôp hiăp mơng mơnuih ƀon sang lĕ 3 čô khua anai lêng kơ dưi ba ruah ngă khua pơ ala mơnuih ƀon sang dêh čar, samơ̆ gơñu hlong rơkâo tơbiă đuăi mă pô, tui hăng kâo pơmin ƀing ta khŏm kiăo tui tơlơi pơmin mơng ƀing gơñu yơh, bruă anai huăi ngă sat hơget kơ mrô mơnuih tơbiă anăn ba ruah ngă khua mơng grup khua pơ ala mơng tơring čar Gia Lai”.

Ơi Đinh Ngọc Hải, Kơ-iăng khua Jơnum min djŏp djuai ania mơnuih mơnam Việt Nam tơring čar Gia Lai lăi pơthâo, tơdơi kơ mông jơnum pơčrông sai tal 3, Jơnum min wai lăng bruă ruah khua tơring čar Gia Lai pơsit laih anăn 14 čô dưi tơbiă anăn ba ruah ngă Khua pơ ala mơnuih ƀon sang dêh čar tal 15 (amăng anun Kơnuk kơna hơmâo pơƀuh brơi 4 čô, mơnuih amăng tơring čar ba pơƀuh 10 čô).

“Tơdơi kơ mông jơnum pơčrông sai tal 3 hơmâo ngă giong lĕ amra čih anăn sit nik, hluai tui anun Khua mua apăn bruă wai lăng djŏp djuai ania mơnuih mơnam Việt Nam tơring čar hăng gong gai djŏp gưl ngă hrŏm hăng Jơnum min mơnuih ƀon sang hrŏm ha gưl prăp lui brơi ƀing khua tơbiă anăn ba ruah ngă khua pơ ala mơnuih ƀon sang dêh čar ăt kah hăng ƀing tơbiă anăn ba ruah ngă Khua Jơnum min pơ ala mơnuih ƀon sang tơring čar brơi pơbưp, hơduah tơña mơnuih ƀon sang, đah mơng jak iâu arăng nao plĕ hră ruah, pơdah tơlơi gơgrong bruă mơng gơñu. Mơng anun, djru mơnuih nao plĕ hră thâo rơđah tơlơi gơgrong bruă mơng rim čô khua ba ruah, tơdah dưi ngă khua lĕ amra gum djru ngă bruă hiư̆m pă mơng dưi akŏ pơjing gong gai djŏp gưl”.

Ƀơi Dak Lak, rơwang hrơi tơjuh rơgao, hrŏm hăng pơphun Jơnum pơčrông sai tal 3, Jơnum min djŏp djuai ania mơnuih mơnam Việt Nam tơring čar hơmâo lăi pơthâo laih boh than mơng bruă jơnum mă tơlơi pơgôp hiăp hăng tơlơi đăo gơnang mơng anih dŏ, pơsit hră čih anăn mơnuih dưi tơbiă anăn ba ruah ngă Khua pơ ala mơnuih ƀon sang dêh čar tal 15 hăng ngă Khua jơnum min pơ ala mơnuih ƀon sang djŏp gưl rơwang thun 2021-2026. Mơng bruă bơkơtuai, ƀơi mông jơnum pơčrông sai tal 3, ƀing khua tŭ ư čih anăn 11 čô khua sit nik dưi tơbiă anăn ba ruah ngă khua pơ ala mơnuih ƀon sang dêh čar tal 15 (aka ƀu yap ba ôh 4 čô lĕ yua Gơnong dlông pơƀuh anăn); tŭ ư brơi 1 čô tơbiă hĭ mơng hră čih anăn ba ruah ngă khua pơ ala mơnuih ƀon sang dêh čar tal 15. Mông Jơnum ăt tŭ ư čih anăn 125 čô khua dưi tơbiă anăn ba ruah ngă Khua jơnum min pơ ala mơnuih ƀon sang tơring čar rơwang thun 2021-2026. Yă Nguyễn Thị Thu Nguyệt, Khua khul pơlir hơbit đah kơmơi Việt Nam tơring čar Dak Lak brơi thâo: Kiăng dưi hơmâo 30% mrô khua lĕ ƀing đah kơmơi dưi ngă khua pơ ala mơnuih ƀon sang djŏp gưl, Khul amra pơphun pok 4 anih pơtŏp bruă ƀơi hơdôm boh tơring glông Krông Ana, Ea Hleo hăng plơi prong Buôn Ma Thuột, pioh kơ rơbêh 300 čô khua đah kơmơi tal blung a tơbiă anăn ba ruah ngă Khua Jơnum min pơ ala mơnuih ƀon sang djŏp gưl:

“Ƀing gơmơi lăi anai lĕ bruă djru hmao tlôn kơ ƀing tơbiă anăn ngă khua kơ tơlơi rơgơi, apăn bruă jak iâu mơnuih ƀon sang plĕ hră, pơhlôm ƀing tơbiă anăn thâo djŏp tơlơi kiăng amăng mông ruah khua, khin jak iâu mơnuih ƀon sang plĕ hră kơ ƀing gơñu kiăng klă hloh. Biă ñu tui hăng mrô pơkă lĕ gir pơhlôm hơmâo 30% mrô khua lĕ đah kơmơi ngă khua jơnum min pơ ala mơnuih ƀon sang djŏp gưl”.

Ƀơi Dak Nông, tơdơi kơ bơkơtuai, abih bang khua mua nao pơhmư̆ mông jơnum tŭ ư čih anăn ƀing dưi ba ruah ngă Khua pơ ala mơnuih ƀon sang dêh čar tal 15 lĕ 10 čô (amăng anun gơnong dlông pơƀuh anăn 2 čô, tơring čar pơƀuh anăn 8 čô) laih anun tŭ ư brơi 3 čô khua rơkâo mă pô ruk đuăi hĭ ƀu nao pơbơkưn ngă khua pơ ala mơnuih ƀon sang dêh čar tal 15 ôh. Laih dong, mông Jơnum ăt čih anăn 88 čô mơnuih dưi tơbiă anăn ba ruah ngă khua Jơnum min pơ ala mơnuih ƀon sang tơring čar Dak Nông, rơwang thun 2021-2026. Ơi Điểu Xuân Hùng, Khua Jơnum min djŏp djuai ania mơnuih mơnam Việt Nam tơring čar Dak Nông brơi thâo:

“Tơdơi mông Jơnum pơčrông sai bruă ruah khua tal 3 pơđut hĭ, tơlơi gơgrong bruă mơng Jơnum min djŏp djuai ania mơnuih mơnam tơring čar Dak Nông, gơmơi amra pơsit anăn khua mua ba ruah ngă Khua pơ ala mơnuih ƀon sang dêh čar tal 15 hăng Khua Jơnum min pơ ala mơnuih bon sang tơring čar. Gơmơi amra nao pơ tơring glông, nao pơ să krăp lăng, hơduah tơña rơđah mrô mơnuih ƀon sang, mrô mơnuih dưi nao plĕ hră aka ƀu djơ̆ krĕp hăng anăn hơmâo čih hlâo kơ anun, đah mơng pơhlôm bruă ruah hơmâo tơlơi dưi ngă pô, djơ̆ tơlơi phiăn. Hrŏm hrŏm hăng bruă krăp lăng abih bang khua pơ ala mơnuih ƀon sang dêh čar tal 15 hăng khua jơnum min pơ ala mơnuih ƀon sang djŏp gưl, gơmơi amra jak iâu mơnuih tơbiă anăn ba ruah ƀơi sa anih aset hloh lĕ 10 wơ̆t, bơ khua jơnum min pơ ala mơnuih ƀon sang tơring čar ƀơi sa anih lĕ aset hloh 5 wơ̆t tui tơlơi phiăn”.

Dak Nông pơphun Jơnum pơčrông sai bruă ruah khua tal 3.

Tơdơi mông jơnum pơčrông sai bruă ruah khua tal 3, Jơnum min ruah khua hơdôm boh tơring čar amăng kual Dap Kơdư amra pơphun ngă hơdôm bruă tŏ tui kiăng ƀing tơbiă anăn ba ruah pơphun jak iâu mơnuih plĕ hră ruah, lăi pơthâo glăi hăng mơnuih nao plĕ hră kơ jơlan hơdră ngă bruă mơng ƀing gơñu đah mơng pơdah pơƀuh tơlơi gơgrong bruă ngă khua tơdah hơmâo ruah, laih dong lăi nao hơdôm bruă mơ̆ mơnuih ƀon sang lăp đing nao.

Siu H’Mai: Pơblang