VOV4.Jarai - Čơtlăm lơ 8/11, ƀơi Sang mă bruă Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ nao pơhmư̆ mông ngă Lơphet lăi pơthâo Tơlơi pơtrun pơsit mơng Jơnum min apăn bruă Khua pơ ala mơnuih ƀôn sang dêh čar ta kơ bruă pơdŏng Khul Khua pơ ala mơnuih ƀôn sang giăng mah Việt Nam, Grŭp đah kơmơi Khua pơ ala mơnuih ƀôn sang hăng Grŭp Khua pơ ala mơnuih ƀôn sang hlăk ai lăi pơthâo. Khul khua pơ ala mơnuih ƀôn sang giăng mah Việt Nam hmâo 45 Grŭp khua pơ ala mơnuih ƀôn sang giăng mah kơplah wah Việt Nam hăng Khua pơ ala mơnuih ƀôn sang hơdôm bôh dêh čar. Grŭp đah kơmơi Khua pơ ala mơnuih ƀôn sang Việt Nam hmâo ƀing đah kơmơi Khua pơ ala mơnuih ƀôn sang rŏng rơkâo gum hrom. Grŭp khua pơ ala mơnuih ƀôn sang hlăk ai hmâo ƀing ding kơna lĕ khua pơ ala mơnuih ƀôn sang Việt Nam mơng 45 thun hăng ƀiă hloh. Khua Grŭp lĕ Khua git gai tal sa Khul hlăk ai rơnuk Hồ Chí Minh Nguyễn Anh Tuấn. Pơhiăp amăng mông ngă lơphet lăi pơthâo, Khua git gai wai lăng pơ ala mơnuih ƀôn sang dêh čar ta ơi Vương Đình Huệ đăo gơnang, hluai tui bruă pơtom hiăp mơng hơdôm bôh ƀirô mơng Khua pơ ala mơnuih ƀông sang hăng hơdôm grŭp khua pơ ala mơnuih ƀôn sang giăng mah, đah kơmơi khua pơ ala mơnuih ƀôn sang, khua pơ ala mơnuih ƀôn sang hlăk ai, bruă pơtom hiăp mơng Khua pơ ala mơnuih ƀôn sang amra jai hrơi jai dưi pơđĭ tui, jing pô tô nao rai klă amăng tơlơi gum hrom khua pơ ala mơnuih ƀôn sang./.

Siu H’ Prăk: Pô pơblang