VOV4.Jarai - Mơguah tom brơi (12/7), ƀơi Hà Nội, Khua mir sir dêh čar ta ơi Nguyễn Xuân Phúc, Khua Khul pơgang lŏn ia hăng rơnuk rơnua plơi pla, Khua hơdôm khul ling tơhan mơnuih ƀôn sang nao pơhmư̆ mông ngă lơphet hơdor glăi 75 thun Hrơi gru grua khul pơgang rơnuk rơnua mơnuih ƀôn sang (12/7).

Pơhiăp amăng mông ngă lơphet hơdor glăi, Khua mir sir dêh čar ta ơi Nguyễn Xuân Phúc rơkâo khul pơgang rơnuk rơnua amăng tơlơi hơpă khom djă kơjăp tơlơi pơkă pơhlôm bruă git gai khŏp djop bruă mơng Ping gah, tơlơi git gai mơng Khua mir sir, tơlơi tŭ ư hrom wai lăng mơng Kơnuk kơna. Hrom hăng anun ngă tui tơpă, ba glăi bôh tơhnal jơlan gah, hơdră pơtrun mơng Ping gah, hơdră bruă tơlơi phiăn mơng kơnuk kơna kơ pơgang rơnuk rơnua lŏn ia; tơlơi thâo rơđah kơ anô̆ kiăng, bruă mă ba tơbiă lĕ djă pioh rơnuk rơnua lŏn ia amăng djop tơlơi, ƀu pioh dô̆ tơguang pơđar, hmâo kah mơng pơsir. Khua mir sir dêh čar ta ơi Nguyễn Xuân Phúc rơkâo khul pơgang rơnuk rơnua ngă tui ba glăi bôh tơhnal hơdôm tơlơi pơmin, jơlan gah: Rơnuk rơnua gơgrong hlâo, khom pơgang hlôm hlâo mơng tañ, ataih hơdôm tơlơi amra truh, bôh than amra ngă ƀu hơđong; mă pơgang hlôm hlâo, djă pioh kơjăp mơng amăng lăm jing phun, amăng anun tơlơi rơnuk rơnua plơi pla khom jing phun yôm phăn pioh pơdŏng hăng pơđĭ kyar lŏn ia./.

Siu H’ Prăk: Pô pơblang