VOV4.Jarai-Klăm mơmŏt lơ 19/11, jơnum ngă lơphet hơdor glăi, h’ŭ kơ mơnuih djai yua kơ klin Covid 19, hơmâo pơphun pơdah amăng tivi ƀơi hơdôm anih lăng nao rai anun lĕ sang jơnum prong Thống Nhất, ƀơi ƀôn prong Hồ Chí Minh hăng Đang bơnga Thống Nhất, ƀơi ƀôn prong Hà Nội. Ƀơi anih pơdah mơ̆ng sang jơnum Thống Nhất, ƀôn prong Hồ Chí Minh, khua mua ping gah, kơnuk kơna ta ƀuh ƀô̆ amăng mông ngă lơphet hơmâo h’ŭ čuh ñang, dưm guang bơnga kơ mơnuih rơngiă, amăng anun kơnung djuai, ană plơi pla, mơnuih ƀôn sang ta dŏ pơ dêh čar tač rơngiao, ling tơhan djop anom bruă djai yua kơ klin Covid 19 ngă.

Pơ ala kơ ping gah hăng kơnuk kơna ta, ơi Đỗ Văn Chiến, ding kơna apăn bruă git gai ping gah dêh čar, Khua anom bruă djop djuai ania mơnuih mơnam Việt Nam pơdah pran jua h’ŭ prong, rơngôt hning hrom hăng sang anŏ hơmâo mơnuih djai, pơsăn drơi jăn ƀudah djai yua klin amăng hrơi blan klin prong Covid 19 ngă rai. Ñu lăi pơtong, yua kơ klin kheng ngă kơtang đơi, hŭi rơhyưt anun yơh khă gir run laih, samơ̆ hơmâo lu mơnuih rơngiă ta aka ƀu dưi jơnum ngă lơphet h’ŭ kơ ƀing gơñu djơ̆ tui tơlơi phiăn gru đưm dêh čar. Truh lơ 19/11, đơ đam dêh čar ta hơmâo čih pioh rơbêh 23 rơbâo 500 čô mơnuih djai yua Covid 19, amăng anun ƀôn prong Hồ Chí Minh rơbêh 74% hăng rơbêh 17 rơbâo čô mơnuih rơngiă.

Klin kheng  ngă rai tơlơi răm ƀăm prong biă mă, lu tơlơi hning rơngôt ruă nuă ol kơdol pran jua. Hơdor h’ŭ kơ ƀing rơngiă tal anai kiăng pơtă pơtăn glăi kơ abih bang ƀing ta kơ tơlơi hŭi rơhyưt mơ̆ng klin kheng ngă. Mông anai, tơlơi blah bong glăi hăng klin Covid 19 ăt dŏ đôč, ƀing ta khom kơtang hloh kơ hlâo, anăm ngă amưng ôh amăng bruă ngă anai.

Nay Jek: Pơblang