VOV4.Jarai - Hrơi anai, lơ 27/10, Khua mua git gai pơ ala mơnuih ƀon sang jơnum mơng ataih kơ tơlơi pơtrun hơdră djru phara pioh pơđĭ kyar mơng 4 boh tơring čar ƀon prong anun lĕ Hải Phòng, Nghệ An, Thanh Hoá hăng Thưà Thiên - Huế. Ƀơi rơngiao anih jơnum, ƀing khua lăi, pok pơhai hơdră djru phara kiăng pơtrut pơđĭ kyar tơlơi bơwih ƀong huă lĕ djơ̆ yơh, samơ̆ khŏm pơhlôm djă bong “lŏn glai, lŏn ngă pơdai”. Sa, dua čô khua lăi, bruă ƀu dưi pơgang ba glai rưng jing ba glăi tơlơi truh prong biă, ngă pơđĭ kyar ƀu hơđong, biă ñu amăng hrơi blan ayuh hyiăng lŏn adai glăk pơplih kơtang. Yua hnun, tơlơi pơkôl pơkă phara amăng wai lăng lŏn tơnah hăng pơplih bruă mă yua lŏn, biă ñu lŏn glai, djru plai ƀiă ngă hră pơ-ar tơnap đơi, djru brơi hơdôm boh tơring čar anai dưi pơplih bruă mă yua lŏn tơdah hơmâo bruă khŏm kiăng yua. samơ̆ bruă pơplih khŏm lăp djơ̆, ba glăi anŏ klă, biă ñu lĕ djă bong ayuh hyiăng lŏn adai hiam hăng pơđĭ kyar hơđong.

Siu H’Mai: Pơblang