VOV4.Jarai-Ƀing ta ƀiă truh hrơi mut hrom abih bang mơnuih ƀôn sang plĕ hră nao ruah mă ƀing mơnuih klă hloh, mơnuih hur har hloh pơ ala kơ tơlơi pơhiăp, anŏ kiăng mơ̆ng ană plơi pla ƀing plĕ hră ruah amăng anih jơnum prong khua mua pơ ala mơnuih ƀôn sang dêh čar, khua mua pơ ala mơnuih ƀôn sang djop gưl.

Sa tơlơi mơ̆ mơnuih ƀôn sang đing nao biă mă lĕ, laih ƀing tơbiă anăn arăng ruah djơ̆ ngă pô pơ ala sit nik kơ mơnuih ƀôn sang, gơñu amra ngă tui tơlơi ƀuăn ƀơi anăp mơnuih ƀôn sang hiư̆m pă, bruă krăo lăng ngă tui tơlơi ƀuăn anun hiư̆m thơ tŭ yua.

Jua mơñi kơtang ngañ biă mă mơ̆ng anih adoh karaoke, mơ̆ng bruă mă mơ̆ng ƀing djă lua kơthung hyu sĭ mơdrô ƀañ kĕo, hăng jua kơtang hơdui hyu pơ djop anih amăng jơlan glông, dưi hơmâo Khua Jơnum min djop djuai ania mơnuih mơnam ƀôn prong Hồ Chí Minh čih pioh tơlơi pơgôp hiăp mơ̆ng mơnuih ƀôn sang plĕ hră lăi pơthâo, laih anun lăi pơhmư̆ amăng mông jơnum lok 20 ƀing pơ ala mơnuih ƀôn sang ƀôn prong Hồ Chí Minh tal IX, hơmâo pơjing rai sa tơlơi bơtơña nao rai kơdok kơdor mơtam.

Ơi Nguyễn Thành Phong, Khua Jơnum min mơnuih ƀôn sang ƀôn prong Hồ Chí Minh laih anun ƀing pơ ala mơnuih ƀôn sang ƀôn prong tal IX ăt hơmâo tŭ mă lu tơlơi pơhing mơ-it nao amăng telephôn, mơnuih ƀôn sang rơ-añ biă mă kơ tơlơi anun. Ơi Phong brơi thâo, lơ̆m tŭ mă tơlơi pơhing mơnuih ƀôn sang mơ-it, ñu hlong mơ-it truh pơ ƀing khua mua apăn akŏ djop tơring glông, kuân anih arăng lăi hơmâo tơlơi anun brơi ĕp lăng hăng pơsir mơtam.

Ƀôn prong Hồ Chí Minh ăt tañ mơ̆n pơtrun hơdră či mă bruă kiăng pơgăn tơlơi adoh karaoke, adoh hăng lua hơdui hyu sĭ mơdrô ƀañ kĕo hăng jua kơtang ngă bơbeč djơ̆ tơlơi hơdip mơnuih ƀôn sang pơkŏn. Tui hăng ơi Nguyễn Thành Phong, ñu kiăng pơsir khut khăt hơdôm bruă pơdjơ̆ nao kơ tơlơi hơmâo djơh hăng anun:

“Juăt ñu sit bưp mơnuih plĕ hră lĕ hmư̆ tơlơi pơgôp hiăp mơ̆ng mơnuih ƀôn sang, tơdơi kơ anun anom bruă jơnum min iâu pơtum glăi hăng mơ-it tơlơi pơgôp hiăp, rơkâo mơ̆ng mơnuih ƀôn sang truh pơ djop gơnong bruă, anŏ hơgĕt djơ̆ amăng tơlơi dưi mơ̆ng kuân lĕ pơsir mơtam, hơgĕt pơdjơ̆ nao pơ gơnong bruă ƀơi ƀôn prong lĕ lăi glăi hăng pơsir mơtam laih nao bưp mơnuih ƀôn sang kiăng huăi hơmâo dơ̆ng tah tơlơi anun, tơlơi mơnuih ƀôn sang lok glăi tơlơi pơgôp hiăp hlâo kơ anun ƀu kiăng hơmâo dơ̆ng tah”.

Anun lĕ tơlơi ƀuăn mơ̆ng ƀing pơ ala mơnuih ƀôn sang hăng ƀing plĕ hră ruah khua dưi ngă tui. Samơ̆ ăt dŏ lu tơlơi ƀuăn sui biă mă ƀu dưi ngă tui. Hơdôm hơpluh thun hăng anai, sang anŏ yă Phạm Thị The hlăk dŏ ƀơi anih ngă kơčăo bruă man pơdong phrâo aka ƀu jing ƀơi Bình Qưới-Thanh Đa.

Sang anŏ ƀing gơ̆ ƀu dưi ming pơkra glăi pưk sang, ƀu dưi sĭ mơdrô sang ƀudah ƀu thâo kah pơpha kơ adơi ayong ană bă yua dŏ gun hăng hră pơar tơlơi phiăn pơkă. Tui hăng yă The, tơlơi anai hơmâo lăi pơthâo laih amăng mông jơnum, lu wơ̆t bưp ƀing pơ ala kơ mơnuih ƀôn sang samơ̆ truh ră anai kơnong gơñu čih pioh hăng ƀuăn na nao aka ƀu pơsir ôh. Tui hăng yă The hăng hơdôm rơbâo sang anŏ pơ anun kơnong čang rơmang khua mua gong gai kơnuk kơna pơsir tañ bruă anai djơ̆ hăng tơlơi pơkă kiăng hơđong tơlơi hơdip mơda mơnuih ƀôn sang.

Hăng mơnuih ƀon sang plĕ hră, tơlơi mơ̆ gơñu kiăng, anun lĕ ngă hiư̆m pă lu khua mua pơ ala ƀuăn samơ̆ truh abih rơwang bruă laih aka ƀu pơsir mơ̆n tơlơi ƀuăn. Kơ bruă krăo lăng tơlơi ƀuăn, tui hăng nai thâo kơđi Trương Thị Hoà, ding kơna Jơnum min djop djuai ania mơnuih mơnam Việt Nam ƀôn prong Hồ Chí Minh lăi, kơnong kơnang kơ hră lăi pơthâo amăng mông jơnum bưp mơnuih ƀôn sang plĕ hră. Hră lăi pơthâo anun brơi kơ mơnuih ƀôn sang plĕ hră thâo tơlơi ƀuăn mơ̆ng ƀing pơ ala mơnuih ƀôn sang ngă hơdơ̆ pă, tơlơi gun či hơƀơi yua dah ƀu djơ̆ tơlơi ƀuăn pơpă hai lêng kơ dưi ngă truh kih ôh, ƀu dưi ngă giong amăng sa mơguah tlam mơtam. Mah hnun tơlơi anai ƀơi hơdôm wơ̆t bưp mơnuih ƀôn sang plĕ hră aka ngă klă ôh:

“Bruă krăo lăng ră anai tui hăng kâo tơdah ta pơkă kơ bruă lăi pơthâo hiư̆m pă rĭm wơ̆t jơnum bưp mơnuih plĕ hră, ta lăi pơthâo pơkă hăng hơdră ƀuăn ngă tui, hơgĕt bruă dưi ngă laih? Kâo ƀuh boh yôm phun amăng rĭm wơ̆t jơnum bưp mơnuih plĕ hră lĕ ƀu djop mông ôh ƀudah aka ƀu hơmâo črăn anai. Rơngiao kơ bưp mơnuih plĕ hră ăt khom hơmâo mơ̆n hơdră pioh kơ pô pơ ala khom ngă giong bruă hơgĕt lăi pơthâo bruă gơñu laih kơ mơnuih ƀôn sang hmư̆. Ta aka ƀu ngă gêh gal ôh".

Ơi TrầnViệt Anh-Ding kơna Jơnum min djop djuai ania mơnuih mơnam Việt Nam brơi thâo: Jơnum min djop djuai ania Việt Nam djop gưl ngă hrom anom bruă kơnuk kơna, ƀing pơ ala mơnuih ƀôn sang dêh čar hăng tơring čar khom ĕp lăng tong ten na nao hơdră mă bruă mơ̆ng ƀing pơ ala mơnuih ƀôn sang.

Samơ̆, ơi Trần Việt Anh rơkâo đĭ rơđah rơđong hloh hăng tơlơi pơtrun laih anun kơsem min tơlơi phiăn ngă tui tơlơi ƀuăn anun. Hơmâo tơlơi phiăn kah djru kơ mơnuih ƀôn sang ƀing plĕ hră dưi thâo tơlơi ƀuăn mơ̆ng ƀing pơ ala dưi ngă tui hiư̆m pă laih anun kơđai glăi ƀing pơ ala ăt brơi mơnuih ƀôn sang thâo, tơlơi ƀuăn mơ̆ng gơñu dŏ gun či hơƀơi, tơlơi hơgĕt dŏ đôm:

“Tơlơi phiăn čih pơkra tui hăng bruă mă mơ̆ng ƀing pơ ala mơnuih ƀôn sang dêh čar hăng ƀing pơ ala djop gưl. Anun lĕ tơlơi phiăn mă bruă mơ̆ng ƀing pơ ala mơnuih ƀôn sang. Tơlơi anai kâo pơmin kiăng biă mă, samơ̆ blung hlâo hloh lĕ khom pơkă tong ten ngă tui hăng hơdôm tơlơi pơtrun anai khom ngă tui hrup hăng sa bruă gơñu khom ngă yơh”.

Lăi pơthâo bruă ngă tui tơlơi pơtrun hăng krăo lăng tơlơi ƀuăn mơ̆ng ƀing pơ ala, nai prin tha ơi Vũ Trung Kiên, Kơ-iăng Khua anom akŏ pơdong ping gah-sang hră Kơđi čar kual 2 lăi lĕ, bruă krăo lăng mơ̆ng mơnuih plĕ hră yôm biă mă. Tơdah mơnuih ƀôn sang plĕ hră đing nao biă mă amra tơña ƀing pơ ala; rơkâo gơñu lăi pơthâo boh yôm phun tơlơi tơña lăi glăi tal bưp mơnuih ƀôn sang mông pơkŏn:

“Ƀing ta čang rơmang mơnuih ƀôn sang plĕ hră lêng kơ thâo bruă kơđi čar, samơ̆ ƀing ta kiăng hơdôm ƀing tha rơma pơdơi abih thun bruă, ƀing khua tơhan, mơnuih thâo hră, hrăm prong, ƀing tơhan hơđăp….gir run kiăng kiăo tui ƀing pơ ala hăng tơña ƀing pơ ala”.

Dưi lăi ƀing pơ ala mơnuih ƀôn sang lĕ sa tơlơi kơdrưh prong prin kơ djop pô hlơi, yua gơñu lĕ hơmâo hơdôm klăk čô mơnuih plĕ hră đăo kơnang laih ruah gơñu ngă pô pơ ala tơlơi pơmin, pran jua, anŏ kiăng găl kơđi mơ̆ng mơnuih ƀôn sang; pơ ala kơ mơnuih ƀôn sang ngă tui tơlơi dưi mơ̆ng kơnuk kơna.

Pơkă tơlơi ruah mă tong ten, tơlơi kiăng biă mă khom ngă tui djơ̆ tơlơi pơtrun mơnuih ƀôn sang ngă khua pô amăng anom bruă kơnuk kơna, amăng khul mơnuih ƀôn sang pioh ruah hơdôm ƀing mơnuih lăp djơ̆; ƀing pơ ala sit nik yua kơ dêh čar, yua kơ mơnuih ƀôn sang.

Nay Jek: Pơblang