VOV4.Jarai-Amăng hơdôm hrơi rơgao, amăng tơring čar Dak Lak hơmâo hơjan prong kơtang ngă ia ling dăo, ia dong răm ƀăm lu anih pơ tơring glông Mdrak, Ea Kar, Krông Bông, Krông Năng. Tui hăng jŭ yap blung a, tal hơjan anai, ngă kơ hơdôm rơtuh hektar hmua pơdai, đơ đam dơnao ia rông akan, bơnư̆ kong ia răm hĭ, lu ring bruă jơlan glông ƀơi tơring glông Mdrak, Krông Bông, Krông Năng răm mơ̆n. Kơnong tơring glông Mdrak hơjan ia ling dăo ngă kơ sa čô mơnuih djai, sa čô mơnuih rơngiă aka ĕp ƀuh.

Anŏ pơhŭi hlâo črăn jơlan ia ling dăo ƀơi tơring glông Ea Kar, tơring čar Dak Lak

Ră anai, gong gai kơnuk kơna tơring glông pơtum ngă bruă djru pơsir tơlơi truh sat ia ling dăo ngă. Lăi lui hlâo ayuh hyiănghlom hơjan ăt dŏ tơnap tap đôč, anun yơh Jơnum min mơnuih ƀôn sang tơring čar Dak Lak pơtrun hiăp djop tơring glông, plơi pla hăng mơnuih ƀôn sang amăng tơring čar ăt kơđiăng pok pơhai bruă mă bong glăi hăng tơlơi truh lŏn adai ngă, ia ling dăo bơbeč djơ̆ kơ tơlơi hơdip mơda.

Nay Jek: Pơblang