VOV4.Jarai - Khua dêh čar ăt ngă dong mơn hră pơtrun mrô 1102 mơ-it kơ hơdôm boh tơring čar, plơi prong ƀơi Gơnong dlông, hơdôm ding jum anom bruă amăng Kơnuk kơna. Tơlơi hơmâo lăi nao amăng hră pơtrun lĕ kiăng tañ pơgăn, dưi pơgang klin duam ruă, pơgang ba tơlơi suaih pral, tơlơi hơdip mơng mơnuih ƀon sang yơh phun, blung hlâo, khua mua Ping gah tơring čar, Khua ping gah plơi prong, Khua Jơnum min mơnuih ƀon sang tơring čar, ƀon prong, Khua ding jum, Khua anom bruă prong kar hăng ding jum, anom bruă amăng Kơnuk kơna, anom bruă bơdjơ̆ nao pơƀut git gai hăng ngă bruă klă, khut khăt, tŭ yua hơdôm tơlơi pơtrun pơgang klin Covid-19; amăng anun kiăng pơƀut črâo bruă hăng jak iâu abih bang mơnuih ƀon sang gum djru ngă tom; lăi să, phường, tơring kual lĕ “puih kơđông”, mơnuih ƀon sang lĕ “ling tơhan”, ngă anih phun kiăng bơwih brơi, jing pô pơgang klin. Bruă pơphun ngă bruă ăt jing bruă tơdu mơn, biă ñu ƀơi să, phường, tơring kual. Hơdôm ding jum, anom bruă kiăo tui tơlơi dưi, bruă kơnuk kơna jao ječ ameč pơsir hĭ tơlơi aka ƀu djơ̆, aka ƀu dưi ngă, pơphun ngă bruă khut khăt hloh, klă hloh dong.

Siu H’Mai: Pơblang