VOV4.Jarai - Mơng lơ 1/4/2021, hră pơhlôm nua ia jrao gru phrâo amra hơmâo mă yua amăng dêh čar ta. Hră pơhlôm nua ia jrao phrâo hơmâo pơplih tui, ba glăi lu tơlơi klă kơ mơnuih blơi yua, biă ñu amăng bruă rơkâo brơi hră pơhlôm nua, djă pioh hăng mă yua hră khăm pơjrao tơlơi ruă. Tui anun, Hră pơhlôm nua ia jrao phrâo anet ƀiă kah hăng hră căn cước hăng the ƀing ta pioh prăk, hơmâo pơƀlir hăng plastic tơdơi kơ in giong, djă pioh hăng mă yua amuñ biă. Mrô hră dŏ glăi 10 mrô đôč, plih hĭ 15 mrô tui hăng mơng hlâo. Hră pơhlôm nua ia jrao phrâo hơmâo čih pơmut abih hrơi blan blơi hră pơhlôm nua mơnuih mơnam, pơhlôm nua ia jrao mơng pô blơi. Tơlơi lăp đing nao hloh lĕ, lơ̆m blơi hră pơhlôm nua ia jrao mă yua boh thâo hră pơhlôm nua mơnuih mơnam mrô - VSSID, lơ̆m nao khăm pơjrao tơlơi ruă ƀu kiăng djă ba hră pơhlôm nua ia jrao ôh yua dah rup the pơhlôm nua hơmâo čih pơmut amăng măi mok laih.

Siu H’Mai: Pơblang