VOV4.Jarai - Hrơi anai (20/7), pok phun Jơnum lok sa Khua pơ ala mơnuih ƀôn sang dêh čar ta tal 15. Hlâo kơ anun, ƀơi Sang mă bruă Khua pơ ala mơnuih ƀôn sang hmâo pơphun jơnum kơplah wah Ping gah Khua pơ ala mơnuih ƀôn sang hăng Grŭp mă bruă Ping gah, Kơnuk kơna. Pơsit bruă prăp lui bôh yôm tal jơnum lok sa, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi lĕ, hơdôm ƀirô mơng Khua pơ ala mơnuih ƀôn sang, Jơnum min apăn bruă Khua pơ ala mơnuih ƀôn sang dêh čar hăng Kơnuk kơna, hơdôm ding jum, gơnong bruă, hơdôm bôh ƀirô tơlơi phiăn hmâo gum hrom kơjăp, phun ñu hmâo laih tơlơi tŭ ư prong hăng bôh yôm lăi pơthâo kơ Khua pơ ala mơnuih ƀôn sang. Amăng tơlơi klin Covid-19 ngă tơnap, Ping gah mơng Khua pơ ala mơnuih ƀôn sang hmâo mă bruă laih hăng hơdôm bôh ƀirô bơdjơ̆ nao, lăi pơthâo glăi mơng Ding jum kơđi čar hăng amra jơnum pơƀut hơbit ƀơi anih jơnum Diên Hồng hăng pran jua pơkrem mông mă bruă hăng ba glăi bôh tơhnal prong hloh, pơhlôm hloh, jơlan hơdră Tal jơnum amra ƀiă hĭ, pơkă hlâo amra pơđut amăng lơ 31/7, mă bruă wot amăng hơdôm hrơi pơdơi. Gah jơlan gah pơhlôm kơ tal jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, Anom bruă Kơnuk kơna, Ding jum ia jrao hmâo  gum hrom tañ laih kiăng prăp lui kơ tal jơnum lok sa, Khua pơ ala mơnuih ƀôn sang dêh čar tal 15. Hăng pran jua pơhlôm khop, truh kơ ră anai abih bang ƀing khua pơ ala mơnuih ƀôn sang hăng mơnuih djru bruă Anom mă bruă Khua pơ ala mơnuih ƀôn sang dưi tlâ̆o pơgang hlôm hlâo, pơčrang lăng./.

Siu H’ Prăk: Pô pơblang