VOV4.Jarai - Bruă mơnuih apăn bruă lĕ bôh yôm phun mơng dua hrơi mă bruă tuč rơnuč tơdơi kơ Khua pơ ala mơnuih ƀôn sang ngă ƀiă hĭ jơlan hơdră Tal jơnum lok sa 3 hrơi. Amăng mơguah anai (26/7) mơtăm, Jơnum min apăn bruă Khua pơ ala mơnuih ƀôn sang lăi pơthâo glăi bôh tơhnal bơkơtuai amăng Grŭp hăng lăi pơblang, tŭ mă tơlơi gum pơhiăp mơng khua pơ ala Khua pơ ala mơnuih ƀôn sang dêh čar kơ pơkă hlâo mơnuih apăn bruă kiăng ruah Khua mir sir.

Ƀing khua pơ ala Khua pơ ala mơnuih ƀôn sang plĕ hră ngă giong bruă ruah khua amăng Tal jơnum lok sa

Pô dưi lăi pơthâo lĕ ơi Nguyễn Xuân Phúc – Khua mir sir glăk apăn bruă. Tơdơi kơ bơkơtuai, Khua pơ ala mơnuih ƀôn sang dêh čar ta ruah Khua mir sir dêh čar hăng hơdră plĕ hră hơgom, lăi pơthâo mơnuih apăn bruă, Khua mir sir dêh čar đĭ lăi pơsit apăn bruă. Kiăo tui anun, jơlan hơdră ruah mơnuih apăn bruă, Khua mir sir lăi pơthâo hră čih anăn ba tơbiă pioh ruah Khua dêh čar; ruah Kơ-iăng Khua mir sir, Khua Sang phăt kơđi dêh čar, Khua Anom pel ĕp kơđi tơlơi dêh čar. Bôh tơhnal bơkơtuai ƀơi grŭp kơ pơkă lăng hlâo mơnuih apăn bruă dưi hmâo Jơnum min apăn bruă Khua pơ ala mơnuih ƀôn sang lăi pơthâo glăi amăng mông mă bruă čơtlăm anai hlâo kơ Khua pơ ala mơnuih ƀôn sang pơsit pel ĕp hră čih anăn mơnuih ruah khua./.

Siu H’ Prăk: Pô pơblang