VOV4.Jarai - Hrơi anai, Khua pơ ala mơnuih ƀon sang dêh čar tŏ tui pơčrông sai lăng nao rai mơng ataih kơ črăn tơlơi pơsit mă yua ngăn drăp, prăk kak kiăng kơ djru amăng jơlan hơdră hơkrŭ glăi tơlơi bơwih ƀong huă - mơnuih mơnam hăng pơčrông sai lăng nao rai mơng ataih kơ črăn tơlơi pơsit ngă lông lăng sa, dua hơdră bruă yôm phun amăng pơđĭ kyar ƀôn prong Cần Thơ. Tlam lơ 6/1, Khua pơ ala mơnuih ƀon sang dêh čar pơčrông sai ƀơi grup kơ tơlơi pơtrun tuh pơ alin amăng akŏ bruă man pơkra jơlan rơdêh đuăi hmar mơng Kơdư- Dơnung gah Ngŏ rơwang thun 2021-2025. Boh tơhnal hơmâo ƀing khua mua đing nao lĕ tơlơi tŭ yua amăng bruă pơhưč, mă yua prăk kak hăng thun blan pơgiong ring bruă. Akŏ bruă man pơkra jơlan rơdêh đuăi hmar Kơdư  - Dơnung gah Ngŏ rơwang thun 2021-2025 glông 729km, pơpha jing 12 akŏ bruă anet. Kơ rơnoh prăk tuh pơ alin, tui hră mơ-it Kơnuk kơna, lĕ giăm 146.990 klai prăk. Amăng hrơi blan lu tơlơi tơnap tap hăng prăk kak dŏ kơƀah, ƀing khua mua pơ ala mơnuih ƀon sang rơkâo ruah hơdôm ară jơlan phun man pơkra hlâo, jŭ yap brơi lăp djơ̆, ruah hơdră tuh pơ alin …Pơgôp amăng črăn tơlơi pơsit lông lăng sa, dua hơdră bruă phun amăng pơđĭ kyar ƀôn prong Cần Thơ, ƀing khua mua brơi thâo amra pơhưč, hrưn đĭ tơlơi hơdip kơ mơnuih ƀon sang, man pơdong ƀôn prong Cần Thơ jing ƀôn prong phun amăng kual ia lŏn dăo Cửu Long, pơgôp prong prin amăng pơđĭ kyar hrŏm amăng lŏn ia ta pơ anăp anai.

Siu Đoan: Pơblang