VOV4.Jarai - Mơmŏt lơ 24/10, Hrơi jao pri Hră pơhing lŏn ia tal 15 hơmâo pơphun ƀơi Sang gru grua bruă mă giang mah Việt Xô, Hà Nội. Anai lĕ hrơi jao pri tui tơđar prong hloh, hmư̆ hing kơ ƀing mă tơlơi pơhing phrâo amăng đơ đam dêh čar. Nao jơnum hơmâo Khua mir sir dêh čar ơi Nguyễn Xuân Phúc hrŏm hăng khua mua Ping gah, Kơnuk kơna ta. Pri hră pơhing lŏn ia tal 15 - thun 2020 hơmâo lu hloh mơnuih  mă tơlơi pơhing, tơlơi čih pôr pơhing nao pơplông mă pri dong mơng hlâo adih, hăng rơbêh 1.800 tơlơi čih pôr pơhing mơng 63/63 grup mơnuih mă tơlơi pơhing amăng hơdôm tơring čar, ƀôn prong. Amăng mrô anai, hơmâo 150 tơlơi čih dưi mut čom puang truh tal rơnuč. Anai lĕ tal blung a Khul jao pri hră pơhing lŏn ia hơmâo ruah sa tơlơi čih mă pri prong hloh, hrŏm hăng añun hơmâo jao 9 pri Q, 25 pri B, 45 pri C hăng 32 pri pơtrut pơsur pran brơi kơ djop mơta tơlơi čih. Gong phun jua pơhiăp dêh čar Việt Nam hơmâo 3 pri B, 1 pri C hăng 1 pri pơtrut pơsur pran.

Siu Đoan: Pơbalng