VOV4.Jarai - Lơ 20/12, ƀơi plơi prong Buôn Ma Thuột, Khul mơnuih phĭn rup Việt Nam gum hrŏm hăng Jơnum min mơnuih ƀon sang tơring čar Daklak hăng Khul čih boh pia, tơlơi adôh suang tơring čar Daklak pơphun hrơi pơdă prưng rup kual Tong krah hăng Dap kơdư tal 26 thun 2021. Hrơi pơdă prưng hơmâo 172 pok rup mơng lu mơnuih phĭn rup mơng Khul boh pia adôh suang 10 boh tơring čar, ƀôn prong amăng kual, hơmâo Đà Nẵng, Quảng Nam, Quảng Ngãi, Bình Định, Phú Yên, Khánh Hoà, Daklak, Dak Nông, Gialai hăng Kontum.

Ƀing tuai nao lăng rup ƀơi Sang djă pio gru grua yôm tơring čar Daklak

Hơdôm rup anai pơdah rơđah tơlơi hơdip mơda, bruă bơwih ƀong ngă đang hmua; pơgang klin Covid-19 mơng rĭm boh ƀon lan. Hơdôm ring bruă, hrơi ngui gru grua ƀudah hơdôm hrơi ngui kiăng djă pioh gru grua djop djuai ania kah hăng kiăng pơdah tơlơi yôm phara amăng tơlơi hơdip mơda. Hrơi pơdă prưng pơphun ƀơi Sang djă pioh gru grua yôm tơring čar Daklak, lĕ sa amăng hơdôm bruă mă pioh hơdor Hrơi akŏ pơjing khul ling tơhan Việt Nam, pioh čơkă thun phrâo 2022.

Siu Đoan: Pơblang