VOV4.Jarai - Amăng mông jơnum hăng ƀing mă tơlơi pơhing phrâo kơ bruă prap lui jơnum tal blung a Khua pơ ala mơnuih ƀon sang dêh čar tal XV, Khua čit pioh Khua pơ ala mơnuih ƀon sang dêh čar ơi Bùi Văn Cường brơi thâo: klin Covid-19 glăk tơnap tap ƀơi lu tơring čar, samơ̆, tui tơlơi pơkă phrâo anai 60 hrơi tơdơi kơ hrơi plĕ hră ruah Khua pơ ala mơnuih ƀon sang dêh čar amra pơphun jơnum tal blung a Khua mua pơ ala mơnuih ƀon sang dêh čar phrâo.

Khua čih pioh Khua pơ ala mơnuih ƀon sang dêh čar ơi Bùi Văn Cường git gai jơnum hăng ƀing mă tơlơi phrâo

Črăn akŏ phun amăng tal jơnum anai lĕ ruah khua mua pơprong amăng Kơnuk kơna yua anun ƀing khua mua amra jơnum pơƀut, plĕ hră hơgŏm. Tal jơnum amra pơphun amăng lơ 20/7/2021, tañ ƀiă 5 hrơi tui tơlơi pơkă. Tal jơnum anai yôm phăn biă mă, lĕ akŏ phun kơ bruă mă mơng Khua pơ ala mơnuih ƀon sang dêh čar tal XV, amăng anun hơmâo bruă ruah ƀing khua mua amăng hơdôm anom bruă amăng Kơnuk kơna; sem lăng, pơčrông sai hơdôm tơlơi lăi pơthâo amăng bơwih ƀong huă - mơnuih mơnam hăng tơlơi pơsit sa, dua bruă yôm phun pơkŏn dong.

Siu Đoan: Pơblang