VOV4.Jarai - Khua čih pioh Ƀirô Khua pơ ala mơnuih ƀon sang dêh čar, khua anom bruă pơphun plĕ hră ruah khua dêh čar Bùi Văn Cường lăi pơtong hrơi plĕ hră ruah Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026 pơphun hiam klă. Mrô mơnuih nao plĕ hră đơ đam dêh čar lĕ 95,65%, đa hơmâo anih truh pơ 99,92%, ƀon lan ƀiă hloh lĕ rơbêh 84%. Tơlơi anai brơi ƀuh mơnuih ƀon sang đơ đam dêh čar, mơng kual ataih, asuek truh pơ plơi prong, bul pơtâo lêng kơ hur har ngă tui tơlơi dưi mơng ƀing gơñu. Hăng pran đăo gơnang kơ Ping gah, Kơnuk kơna mơnuih ƀon sang hơmâo ruah đĭ ƀing khua mua ƀing gơñu đăo gơnang đĭ apăn bruă amăng Kơnuk kơna, anun lĕ Khua pơ ala mơnuih ƀon sang dêh čar  hăng khua khul pơ ala mơnuih ƀon sang djop gưl. Anai lĕ pran hok mơ-ak, mut hrŏm, pơlir hơbit hăng đăo gơnang nao tơlơi git gai mơng Ping gah, Kơnuk kơna.

Mơnuih ƀon sang kual Dap kơdư amăng hrơi plĕ hră ruah khua

Hrom hăng đơ đam dêh čar ta, rơbêh kơ 4 klăk čô mơnuih ruah khua ƀơi hơdôm bôh tơring čar Dăp Kơdư hmâo nao plĕ hră ruah khua pơ ala mơnuih ƀôn sang tal 15, Khul pơ ala mơnuih ƀôn sang hơdôm gưl rơwang bruă 2021-2026. Bruă ruah khua hmâo pơphun laih hăng tơlơi hrơi jơnum. Lu kual plĕ hră tañ ngă giong bruă ruah khua. Hăng tơlơi prăp lui tŏng ten, anun khă hăng anô̆ pha ra hmâo lu anih anom ataih tơnap tap rô nao rai, bruă ruah khua ƀơi hơdôm bôh tơring čar Dăp Kơdư ăt pơphun mơn hăng tơlơi mơng hrơi jơnum prong. Wot ƀơi hơdôm anih dô̆ čơlah Covid-19, anih guang dar yua kơ pơphun hmâo mơnuih ruă, mơnuih ruah khua ăt mơ-ak mơn ngă tui tơlơi dưi pô hăng bruă mă mơng pô. Bruă ruah khua ƀơi Dăp Kơdư pơphun pơhlôm klă gêh gal. Lu anih anom amăng kual Dăp Kơdư hmâo čih pioh mrô mơnuih nao ruah khua lu, kah hăng Lâm Đồng, hmâo 5/12 bôh tơring glông, plơi prong hmâo rơbêh kơ 80% mrô mơnuih ruah khua nao ruah. Cát Tiên, tơring glông ataih, asuek hloh hmâo rơbêh kơ 90%. Ƀơi tơring čar Daklak, tơring glông Čư̆ Kuiñ, hmâo abih bang mrô mơnuih nao ruah khua./.

Siu Đoan - Siu H’ Prăk: Pô pơblang