VOV4.Jarai - Ƀơi tơring glông Ea Kar hăng plơi prong Buôn Ma Thuột, tơring čar Daklak phrâo pơphun Hrơi pơyơr drah Giọt hồng Tây Nguyên thun 2021. Hơdôm rơtuh čô mơnuih ƀon sang nao pơyơr drah samơ̆ ăt ngă tui hơdră pơgang klin, dăp tŏ tui tlôn dŏ tơgăn či pơyơr drah.

Hrơi pơyơr drah “Giọt hồng Tây Nguyên” thun 2021 lĕ bruă mă kiăng kơ ngă tui tơlơi jak iâu nao pơyơr drah - bơyan pơdơi prong thun 2021 hăng jơlan hơdră pơyơr drah tal 8 yua Khul git gai dêh čar amăng pơsur mơnuih nao pơyor drah pơphun. Hăng tơlơi jak iâu “Sa djroh drah pơyơr - Djru brơi tơlơi hơdip kơ sa čô mơnuih” , mah amăng hrơi blan klin Covid-19 glăk ngă tơnap tap ƀơi lu anih, mơnuih ƀon sang tơring čar Daklak ăt abih pran jua nao pơyơr drah. Abih bang mơnuih lêng kơ khut khăt ngă tui tơlơi pơtrun 5k mơng Ding jum ia jrao, dăp tŏ tui tlôn dŏ tơguăn čih anăn mut nao mă drah. Ayong Trương Văn Lợi, mă bruă ƀơi Anom bruă wai lăng sĭ mơdrô pơ tač rơngiao Daklak brơi thâo:

"Ngă tui tơlơi jak iâu mơng Khul mơnuih mă bruă mut phung, kâo pô ăt nao pơyor drah hrŏm hăng đơ đam dêh čar kiăng pơgăn hĭ klin Covid-19. Nao pơyơr drah ăt ngă tui tơlơi pơtrun 5k. Mơng hơdôm tal pơyơr drah kâo čang rơmang hơdôm anung drah anai amra djru brơi ƀing mơnuih dju djuăm duam ruă".

Anih pơyơr drah pơhlôm pơgang klin Covid-19

Amăng tal pơyor drah anai ƀu djơ̆ kơnong hơmâo mơnuih ƀon sang amăng plơi prong Buôn Ma Thuột đôč ôh mơ̆ ăt hơmâo lu mơnuih mơng hơdôm tơring glông jum dar. Amai Nguyễn Thị Hương, nai pơtô ƀơi Sang hră gưl tlâo Quang Trung, tơring glông Krông Pač, Daklak lĕ mơnuih nao mơng mơguah, brơi thâo:

"Rĭm thun kâo lêng kơ ngă tui tơlơi jak iâu nao pơyơr drah mơng djop gưl, rĭm thun kâo nao pơyơr mơng 2 - 3 wŏt tui tơlơi črâo ba. Hrơi anai nao pơyơr drah kâo hơmâo khul mơnuih mă bruă mut phung pơtă pơtăn kơ bruă pơgang klin hăng kâo pô ăt kar hăng ƀing mơnuih apăn bruă amăng sang hră lêng kơ ngă klă kiăng pơgang klin, pơhlôm ngă tui 5k tui tơlơi pơtrun mơng Ding jum ia jrao".

Mơnuih ƀon sang dong dăp tŏ tui tlôn hlâo kơ ngă hră pơ-ar mut nao pơyơr drah

Tui ơi Nguyễn Đức Phú, Khua anom bruă git gai pơyơr drah tơring čar Daklak, kiăng kơ djơ̆ hăng tơlơi rơkâo amăng pơjrao mơnuih ƀă klin Covid-19, mơng akŏ thun truh ră anai tơring čar Daklak hơmâo pơphun lu tal pơyơr drah, pơhưč lu mơnuih ƀon sang. Kơnong jơlan hơdră pơyơr drah Hành trình đỏ hăng jơlan hơdră Những giọt máu hồng - bơyan pơdơi prong thun anai hơmâo pơphun tañ ƀiă 1 blan pơhmu hăng rĭ thun, kiăng kơ djru brơi hmao tlôn drah brơi hơdôm anom bruă mă drah dêh čar.

"Hơdôm tal pơyơr drah rơngiao hăng pơjrao ječ brơi mơnuih ruă kă amăng tơring čar ăt pơgôp brơi drah brơi anom bruă mă drah dêh čar lĕ anom bruă kual kơdư. Ră anai yua klin Covid-19 glăk ngă tơnap tap yua anun ƀu hơmâo drah yua yua  anun Khul git gai ăt ba nao drah brơi kơ anom bruă mă drah dêh čar".

Hrơi pơyơr drah “Giọt hồng Tây Nguyên” thun anai amra pơphun ƀơi 6 anih amăng tơring čar Daklak, him lăng mă ƀiă biă mă ñu 2.900 anung drah. Kơnong amăng lơ 8/6 laih rơgao, jơlan hơdră hơmâo tŭ mă rơbêh 1.000 anung drah. Hlâo anun rơbêh 1.200 anung drah hăng ba nao 500 anung drah pơ djru anom bruă mă drah dêh čar.

H’Xíu: čih

Siu Đoan: Pơblang