VOV4.Jarai - Tlam (8/12) ƀơi Hà Nội, Khul mơnuih ngă hmua Việt Nam gum hrŏm hăng Ding jum ngă hmua hăng pơđĭ kyar ƀon lan pơphun jơnum lăng nao rai mơng ataih kiăng kơ kĭ pơkôl tui “Jơlan hơdră gum hrŏm pơtrut pơtô pơblang, pơdong plơi pla phrâo pơlir hăng pơplih glăi bruă ngă hmua rơwang thun 2021-2025”. Đĭ pơhiăp amăng mông kĭ pơkôl, ơi Lương Quốc Đoàn, Khua khul mơnuih ngă hmua Việt Nam lăi pơtong, amăng tơlơi tô nao rai kơplah wah ngă hmua - mơnuih ƀon sang-ƀon lan, mơnuih ƀon sang lĕ phun, ƀon lan lĕ tơlơi gal, ngă hmua lĕ tơlơi pơtrut pơsur. Khua ding jum ngă hmua hăng pơđĭ kyar ƀon lan Lê Minh Hoan čang rơmang, kiăng kơ thâo rơđah pran jua hăng tơlơi pơmĭn mơng mơnuih ƀon sang- hơdôm anŏ aphun hăng lĕ ƀing ngă akŏ amăng djop jơlan hơdră pơjing tơlơi bơwih ƀong huă- mơnuih mơnam; ngă hiưm pă kiăng mơnuih ƀon sang thâo rơgơi kiăng hrưn đĭ pơdrong asah amăng thun blan bruă ngă hmua glăk pơplih mơng ngă tui hơđăp hơdai nao pơplih phrâo, tơlơi anai kiăng hơmâo ƀing apăn bruă gah khul ngă hmua hăng ding kơna ƀơi ƀon lan gum hrŏm ngă.

Siu Đoan: Pơblang