VOV4.Jarai - Mơguah lơ 5/10, ƀơi Hà Nội, Khul hlăk ai čơđai anet dêh čar gum hrŏm hăng Khul čơđai sang hră gưl prong Việt Nam hăng Kông ti pơčruih ngăn Thiên Long pơphun jơlan hơdră “Jao gơnam hrăm hră - Djru brơi ƀing čơđai” thun 2021 kiăng kơ djru brơi ƀing čơđai bơbeč nao kơtang mơng klin hơmâo gơnam pioh hrăm hră. Jơlan hơdră anai hơmâo pok pơhai ƀơi hơdôm tơring čar, ƀôn prong glăk pơčlah mơnuih mơnam hăng hơdôm tơring čar, ƀôn prong bơbeč nao kơtang mơng klin Covid-19, anăp nao djru brơi ƀing čơđai sang anŏ ƀun rin, mơnuih djuai ania ƀiă, ană bă ƀing kông nhơn glăk mă bruă ƀơi hơdôm kông ti, sang măi; hăng ană ƀă ƀing ling tơhan, ơi ia jrao, nai ia jrao, ƀing mơnuih djru pơgang klin tơnap tap. Mơng anai truh rơnuč thun anai, Jơlan hơdră “Jao gơnam hrăm hră-Djru brơi ƀing čơđai” amra jao rơbêh 8.000 anung gơnam hrăm hră hăng gơnam ngui; 650 anung prăk djru hrăm hră brơi ƀing čơđai gưl 1,2; 200 anung djru brơi ƀing đai sang hră gưl prong tơnap tap; 20.000 gơnam hrăm hră brơi ƀing čơđai ƀun rin ƀơi kual ataih, asuek rơwang thun 2021-2025.

Siu Đoan: Pơblang