VOV4.Jarai - Tŏ tui hơdôm hrơi jơnum, hrơi anai, Khua pơ ala mơnuih ƀon sang dêh čar tŏ tui tơña hăng lăi glăi tơlơi tơña hăng Khua ding jum kơčăo bruă hăng tuh pơ alin, Khua dêh čar ta ơi Phạm Minh Chính ăt amra ngă rơđah kơ bruă bơdjơ̆ nao hăng lăi glăi tơlơi tơña mơng khua mua. Amăng yang hrơi tlam tom brơi 11/11, Khua git gai pơ ala mwonuih ƀon sang dêh čar ăt git gai mông tơña hăng lăi glăi tơlơi tơña tal 4 kơ bruă kơčuă bruă hăng tuh pơ alin.

Lu bruă dŏ ngă tơnap tap hơmâo khua mua tơña Khua ding jum kơčăo bruă hăng tuh pơ alin Nguyễn Chí Dũng, anun lĕ: Hơdră hơkrŭ glăi hăng pơđĭ kyar bơwih ƀong huă pơ anăp anao; Gum djru; pơsir hĭ tơnap tap brơi kơ anom bơwih ƀong sĭ mơdrô kiăng hơkrŭ glăi, pơđĭ kyar bơwih ƀong sĭ mơdrô; hơdră pơtrut tañ bruă jao prăk tuh pơ alin bruă čar, biă mă ñu lĕ hơdôm akŏ bruă yôm phun amăng dêh čar. Lăi glăi tơlơi tơña mơng khua mua, Khua ding jum ơi Nguyễn Chí Dũng brơi thâo, bruă kaih jao prăk tuh pơ alin lĕ bruă pok pơhai tuh pơ alin ƀơi ƀon lan. Kơ hơdră hơkrŭ glăi hăng pơđĭ kyar bơwih ƀong huă pơ anăp anai, Khua ding jum ơi Nguyễn Chí Dũng lăi pơtong, rơnoh prăk mă yua kiăng hơkrŭ glăi bơwih ƀong huă amăng thun 2009 hơmâo ba glăi tŭ yua prong prin lơ̆m anun, samơ̆ ăt brơi ƀuh lu tơlơi ba glăi kiăng mă yua rơnoh prăk djru hơkrŭ glăi bơwih ƀong huă hơmâo pok pơhai klă ƀiă dong pơ anăp anai.

Siu Đoan: Pơblang