VOV4.Jarai-Mơguah lơ 8/11 tui hăng mông dêh čar Japan, dêh čar Japan pok glăi yơh bah amăng tŭ jum mơnuih nao hrăm bruă hăng mă bruă apah mơ̆ng Việt Nam mut mă bruă tơdơi kơ lu blan khom pơdơi hĭ yua bơbeč djơ̆ mơ̆ng klin Covid 19, hăng lu tơlơi gêh găl hơmâo tlâ̆o vaccine pơgang djop laih anun pơčlah bruă ia jrao djơ̆ lăp. Kiăng dưi mut nao pơ dêh čar Japan, mơnuih mă bruă ngă djơ̆ hơdră pơhlôm pơgang klin phrâo mơ̆ng Kơnuk kơna Japan pơtrun.

Tum teč biă mă ñu, hăng mơnuih tlâ̆o djop 2 arăt laih vaccine pơgang Covid 19, boh ƀiă ñu rơgao 14 hrơi tơdơi kơ anun hơmâo tlâ̆o 1 amăng 3 mơta djuai ia jrao vaccine kơnuk kơna Japan pơsit kah hăng Pfizer, Mordena, Astrazeneca laih anun hơmâo boh tơhnal pơčrang kman hăng măi PCR ƀu ƀuh kman ôh amăng 72 mông hlâo kơ mut nao pơ dêh čar Japan. Hăng ƀing aka ƀu tlâ̆o djop 2 arăt ia jrao pơgang ƀudah tlâ̆o hăng djuai ia jrao pơgang pơkŏn rơngiao kơ 3 mơta ia jrao lăi anun, pô anun laih ĕp lăng pơčrang kman hăng măi PCR huăi ƀuh kman ôh amăng 72 mông sit mut nao pơ dêh čar Japan lĕ khom dŏ pơčlah phara amăng 14 hrơi laih mut nao amăng dêh čar Japan.

Nay Jek: Pơblang