VOV4.Jarai - Tơlơi ƀu kơnar gah rơnoh djru kơ abih bang djop djuai ania ƀơi hơdôm kual lĕ tơlơi ba truh pơđĭ kyar ƀu dưm kơnar. Lom anun bôh nik ñu, rơnoh tơnap tap pha ra, bôh thâo tơlơi pơmin pha ra, phiăn juăt hăng jơlan gah ngă đang hmua pha ra. Yua anun, tơlơi tuh pơplai anun tơnap ba glăi bôh tơhnal kah hăng tơlơi čang rơmang. Yua anun, jơlan gah hơpă pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng lĕ tơlơi mơ̆ hơdôm ƀirô kơsem min djuai ania đing nao hơdôm hrơi rơgao.

Bôh nik čih glăi ƀơi sa dua anih anom kual djuai ania ƀiă, 1 sang anô̆ neh wa djuai ania ƀiă djơ̆ anô̆ ñu čơkă mă tơlơi gum djru mơng 4 hơdră bruă pha ra, samơ̆ phun ñu mơng rin rơpa lĕ lŏn ngă đang hmua hăng bôh thâo ngă đang hmua lĕ neh wa akă hmâo mă ôh. Rơgao kơ pel ĕp kual djuai ania ƀiă brơi ƀuh: Mrô sang anô̆ ƀun rin hơdôm thun rơgao hrŏ trun tañ, samơ̆ akă sit nik kơjăp, amra ƀun rin glăi prong biă, lu sang anô̆ kơƀah lŏn ngă đang hmua, lŏn dô̆, akă dưi mă yua ia hơdjă. Ƀơi sa dua anih anom, hơdră bruă bơrơkua nao rai, ƀu thâo đing nao pơ̆ hơpă hlâo ôh.

Lơ 14/10/2021, Khua dêh čar ta hmâo mă yua Jơlan hơdră pơkă mơng lŏn ia pơđĭ kyar bơwih ƀong mơnuih mơnam kual djuai ania ƀiă hăng kual čư̆ siăng rơwang mơng thun 2021-2030. Rơwang sa mơng thun 2021 truh thun 2025 amra pok pơhai 10 rơwang bruă pơsir tơlơi kơƀah lŏn dô̆ sang dô̆, lŏn ngă đang hmua, ia yua; pơkă dưm dăp, pơpha hơđong anih mơnuih ƀôn sang dô̆; pơđĭ kyar bruă ngă đang hmua đang kyâu kơjăp phik; tuh pơplai kơ anom mă yua kiăng hloh; pơđĭ kyar bruă pơtô pơhrăm, pơđĭ tui bôh thâo mơnuih mă bruă pơgang, ngă tui nua yôm bôh thâo, phiăn juăt pơkĕ hrom hăng pơlar bruă tuai čuă ngui, bơwih brơi tơlơi suaih pral kơ neh wa djuai ania ƀiă, ngă tui tơlơi dưm kơnar bơnai hăng rơkơi; tuh pơplai pơđĭ kyar djuai mơnuih djuai ania ƀiă hăng djuai ania dô̆ lu tơlơi tơnap; pel ĕp, lăng tui pơsit bruă pơphun ngă tui jơlan hơdră.

Tui hăng ơi Bùi Sỹ Lợi, Khua hơđăp Jơnum min hơdôm tơlơi mơnuih mơnam mơng Khua pơ ala mơnuih ƀôn sang, jơlan hơdră pơkă mơng lŏn ia pơđĭ kyar bơwih ƀong, mơnuih mơnam neh wa djuai ania ƀiă rơwang mơng thun 2021-2030 ba tơbiă lom anun ƀing ta glăk dô̆ glăi 2 jơlan hơdră pơkă mơng lŏn ia. Anun lĕ jơlan hơdră pơkă mơng lŏn ia pơdŏng plơi pla phrâo hăng Jơlan hơdră pơkă mơng lŏn ia hrŏ trun ƀun rin kơjăp. Yua kơ kiăng pơsit klah čun 2 jơlan hơdră anai kiăng ngă rơđah hơdôm bôh yôm tuh pơplai kơ kual djuai ania ƀiă kual čư̆ siăng dơ̆ hơpă. Dô̆ glăi hơdôm tơlơi phun hơpă mơ̆ dưi pơsir lĕ Jơlan hơdră pơkă mơng lŏn ia pơđĭ kyar bơwih ƀong, mơnuih mơnam kual djuai ania ƀiă hăng kual čư̆ siăng khom pơsir. Tui pran jua Pơtrun pơsit 88 mơng Khua pơ ala mơnuih ƀôn sang lĕ tuh pơplai kiăng pơjing bruă mă kơ mơnuih djuai ania ƀiă hăng kual čư̆ siăng hăng tơhnal pơkă pơđĭ prăk pơhrui glăi, pơplih tơlơi hơdip mơda hăng hrŏ trun rơwang ataih kơplah wah kual čư̆ siăng hăng kual lŏn dăo. Ơi Bùi Sỹ Lợi lăi rơđah:

“Amăng 10 rơwang bruă anun, ră anai glăk pơsit hăng mrô rơwang bruă phun lĕ 50 rơbâo klai prăk kơ tuh pơplai pơđĭ kyar hăng 54 rơbâo klai kơ bruă mă yua na nao lĕ, lăng mrô bruă anai rơđah rơđông ƀing ta akă đing nao tuh pơplai pơđĭ kyar mơ̆ glăk anăp nao mă yua kơ bruă mă, yua anun khom pơmin glăi, ngă hiưm hơpă truh tơhnal pơkă pơjing bruă, ngă gal brơi bruă pơplih tơlơi pơmin mơng neh wa djuai ania ƀiă hăng kual čư̆ siăng, hmâo tơhnal pioh arăng gum hrom lom pơđĭ kyar bơwih ƀong huă pioh hmâo dong prăk pơhrui glăi”.

Tơlơi pơsit, hơdôm hrơi hlâo adih hmâo lu hơdră bruă bơdjơ̆ nao kual anai, samơ̆ djơ̆ anô̆ ñu hơdôm hơdră bruă anai ƀu hmâo tơhnal ha amăng plĕ, đa ñu dô̆ bơrơkua nao rai, ơi Đỗ Văn Sinh, Ding kơna Jơnum min bơwih ƀong mơng Khua pơ ala mơnuih ƀôn sang dêh čar ta lăi rơđah truh Tơlơi pơtrun pơsit 88 mơng Khua pơ ala mơnuih ƀôn sang pơsit Akô̆ bruă abih bang pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng rơwang 2021-2030 hmâo tơhnal abih bang hloh hmâo pơsir tơlơi anai. Hăng tơdah ngă tui jơlan hơdră pơkă mơng lŏn ia pơđĭ kyar bơwih ƀong, mơnuih mơnam kual neh wa djuai ania ƀiă dô̆ hăng kual čư̆ siăng rơwang mơng thun 2021-2030 tui djơ̆ pran jua Pơtrun pơsit 88 mơng Khua pơ ala mơnuih ƀôn sang lĕ, amra hmâo hơdôm hơdră bruă ha amăng plĕ, hăng ngăn rơnoh đing nao pioh pơsir hơdôm tơlơi ba tơbiă kơ kual anai. Ơi Đỗ Văn Sinh lăi lĕ:

“Hơdôm hrơi rơgao hmâo hơdôm rơwang bruă jơlan hơdră kơnuk kơna đa mơng kơnuk kơna dô̆ lu ding jum gơnong bruă pha ra, pơ̆ plơi pla lĕ hmâo lu gơnong bruă pha ra. Tui hăng kâo tâ̆o hloh đing nao sa jơlan phun, hăng dlông kơnuk kơna amra jao kơ sa Ding jum, ƀơi plơi pla ăt hmâo jao mơn kơ sa phun than pioh ƀing ta hmâo tơlơi tŭ ư hrom ngăn rơnoh, kiăng ngă hiưm hơpă ƀing ta đing nao ngăn rơnoh djơ̆ mơnuih, djơ̆ hơdră bruă, huăi bơdjơ̆ nao rai, ƀu hmâo lui raih. Anai lĕ bruă yôm phăn biă”.

Ră anai, hơdôm anih anom hmâo pơphun pok pơhai hơdôm hơdră bruă djuai ania ƀơi plơi pla, pơhlôm “hơdră bruă truh hăng neh wa” dưi tañ hloh hăng ba glăi bôh tơhnal hloh, pơdŏng kơčăo bruă pơpha ngăn rơnoh tuh pơplai hơdră đing nao pioh kơ hơdôm plơi pla ngă pơphô hlâo jơlan hơdră pơkă mơng lŏn ia. Ơi Dương Văn Hào, Kơ-iăng Khua Jơnum min mơnuih ƀôn sang tơring glông Võ Nhai, tơring čar Thái Nguyên pơsit:

“Rơgao hơdôm hơdră bruă anun, hmâo ba glăi laih bôh tơhnal sit nik amăng tơlơi hơdip mơnuih ƀôn sang. Rơđah biă ñu lĕ tơlơi pơmin mơnuih ƀôn sang pơđĭ tui, hrom hăng anun bruă pơđĭ kyar bơwih ƀong ăt hmâo mơn lu tơlơi pơplih phrâo, bruă ba hyu gơnam tam kơplah wah hơdôm kual ăt klă hloh mơn”.

Amăng hơdôm hrơi klin Covid-19 ngă tơnap, sui hrơi blan hăng ngăn drăp dô̆ ƀiă, Kơnuk kơna đing nao ngă tui hơdôm tơhnal pơkă, bruă pơkă phun, đing nao hơdôm kual bơwih ƀong tơnap tap hăng pơsir tơlơi kiăng hloh mơng neh wa djuai ania ƀiă./.

VOV4: Čih – Siu H’ Prăk: Pơblang