VOV4.Jarai-Bruă Kơnuk kơna ngă hră pơtrun mrô 68 kơ jơlan hơdră djru mơnuih mă bruă hăng mơnuih apah mă bruă hăng rơnoh prăk truh kơ 26 rơbâo klai prăk phrâo anai kah dưi mă yua djơ̆ hnong, djru kơ mơnuih hyu mă bruă apah hăng mơnuih apah mă bruă tơnap tap yua klin Covid 19 tŭ mă prăk djru. Tui hăng anun, amăng mrô 12 khul hơdră djru, hơmâo 7 mơta bruă djru prăk mơta kơ mơnuih hyu mă bruă apah  rơngiă hĭ bruă, pơdơi mă bruă, khom pơhrơ̆I mă bruă yua bơbeč mơ̆ng klin Covid 19, rơnoh prăk djru mơ̆ng 1 klăk 500 rơbâo truh kơ 3 klăk 710  rơbâo sa čô, ƀing hyu mă bruă apah rơngai ƀu hơmâo hră pơkôl ôh lĕ 1 klăk 500 rơbâo prăk.

Khua ding jum wai lăng bruă mă tơhan rơka hăng mơnuih mơnam ơi Đào Ngọc Dung brơi thâo: Bruă čih pơkra jơlan hơdră tơlơi phiăn djru kơ khul mơnuih  hyu mă bruă apah tal anai hơmâo lăng tui kơ rơnoh prăk djru hlâo kơ anai:

“Tơhnal pơkă mơ̆ Khua dêh čar ăt kah hăng Khua ding jum jao lĕ kiăng ngă amuñ hloh hră pơar, pơhrŏ trun hơdră ngă hră pơar, kiăng ƀiă ƀiă hrơi mông hăng hơdră ngă bruă brơi gêh găl amuñ hloh djru kơ mơnuih mă bruă, mơnuih apah mă bruă dưi tŭ mă tơlơi djru amuñ hloh”.

Rơnoh prăk djru 26 rơbâo klai prăk mơ̆ng Kơnuk kơna hmâo djru hmao kru, djơ̆ pô, pơhaih tơpă, rơđah rơđong hăng ba glăi boh tŭ yua sit nik, ƀu lui kơ sa čô hlơi ôh. Samơ̆ amăng hơdra djru anai hơmâo sa tơlơi phrâo dơ̆ng lĕ mơnuih ƀôn sang ta khom kơđiăng:

Sit mơ̆n, hơdôm ƀing bơbeč yua mơ̆ng klin Covid 19 anai lĕ lu biă mă, yua kơ anun, rơnoh prăk djru 26 rơbâo klai prăk kah hăng anŏ juh alum, pơtrut pran jua amăng mông tơnap tap. Samơ̆ kơnong dưm dưm hăng 1/3 pơkă hăng rơnoh prăk djru 62 rơbâo klai prăk hlâo adih yua dah anŏ pơtrut pran jua, djru kơ mơnuih arăng djru anun tŭ mă amăng mông tơnap tap biă mă. Sa tơlơi kiăng lăi dơ̆ng, rơnoh prăk djru tal anai, hơmâo sa tơlơi phrâo lĕ jao kơ djop tơring čar čih anăn, mă prăk gong gai tơring čar djru kơ mơnuih ƀôn sang pô tơnap tap amăng tơring čar.

Ơi ia jrao Nguyễn Thu Giang, Kơ-iăng Khua anom bruă pơđĭ kyar bruă mơnuih ƀôn sang, khua khul grup wai lăng mơnuih hyu mă bruă apah brơi thâo:  hơdră ngă phrâo anai jao kơ djop tơring  čar ngă, anun tơlơi gêh găl blung a lĕ ngă bruă hmar hăng hmao kru, yua dah anăn mơnuih mă bruă amăng tơring čar hơmâo jŭ yap glăi čih pơtum djơ̆ rơ-ua.

“Rơnoh prăk djru anai tum teč hloh, brơi tơl pô hơmâo anăn, rơđah rơđong, 12 mơta tơlơi hăng hơdôm khul mơnuih kiăng djru hiư̆m pă. Lăng nao kơ tal djru hlâo kơ anai, ta ƀuh, hơdră djru kaih, ƀing hơmâo anăn kiăng djru truh 3-5 blan kah dưi tŭ mă, tăp năng aka tŭ mă prăk djru, hră pơar ngă dŏ kaih, lu črăn…samơ̆ tal djru anai ƀuh djơ̆ hloh, tong ten biă mă.

Anŏ klă hiam ñu, tơring čar, kual plơi pla thâo tong ten, ƀing ta ƀuh kah hăng ƀôn prong HCM pok pơhai rơnoh prăk djru anai rơbêh 800 klai prăk, amăng anun wơ̆t ƀing hyu sĭ wĕ số, ƀing pơgiăng tuai đĭ rơdêh thut…tui anun bruă jao čih anăn kơ tơring čar, plơi pla gêh găl hloh”.

Lăng nao kơ tal djru hlâo, bruă pok pơhai rơnoh prăk djru 62 rơbâo klai prăk, rơnoh prăk djru tal anai, kơđiăng hloh, ĕp lăng tong ten, ƀuh rơđah bruă mă mơ̆ng khul wai lăng djop djuai ania mơnuih mơnam ngă bruă glăm ba, gơgrong sit nik, wơ̆t anom bruă mơnuih tơpuôl djop gưl Việt Nam sem lăng hrom. Lơ̆m pok pơhai, glăm ba ngă bruă mơ̆ng pô khua wai lăng, ăt hơmâo ngă bruă abih pran jua mơ̆n. Khua ding jum wai lăng Bruă mă Tơhan rơka hăng Mơnuih mơnam, ơi Đào Ngọc Dung lăi:

“12 khul mơnuih dưi tŭ mă anăn djru tum teč biă mă: Hơdră ĕp lăng, čih anăn, pơtong glăi, hrơi blan pơphun, pơsir, pơpha bruă mă rơđah rơđong; pơđĭ tui tơlơi glăm ba, anŏ gơgrong amăng bruă mă mơ̆ng pô ngă khua kah hăng Khua Jơnum min mơnuih ƀôn sang tơring čar, tơring glông. Tơdơi kơ QD23 anai huăi kiăng hơmâo ngă hră pơkŏn dơ̆ng tah. Kơnong tơguan ngă hră pơsỉ hơdră ngă bruă đôč, hră pơtrun ƀu kiăng dơ̆ng tah.

Tui hăng gơmơi ăt lăi tơpă lơ̆m mă bruă, mă bruă rah, čih pơkra rah kơtưn bruă ĕp lăng ngă tui; kơtưn brơi khul wai lăng  djop djuai ania mơnuih mơnam ĕp lăng, mơnuih tơpuôl hăng khul grup mơnuih mơnam ngă hrom...'’.

Tơdah rơnoh prăk 62 rơbâo klai hơmâo hrơi mông ngă hră pơar brơi kơ mơnuih hyu mă bruă apah čan prăk tla hăng prăk blan, yua pơdơi hĭ bruă amăng sa blan 10 hrơi, rơnoh prăk djru tal anai, hrơi mông ngă kơnong 7 hrơi, 4 hră tŭ mă hră pơar hăng 3 hrơi pơsir brơi čan prăk yơh. Yua kơ anun, bruă ngă amuñ hră pơar anai kiăng djru mơnuih ƀôn sang hăng sang bruă sĭ mơdrô dưi tŭ mă tañ hơdră kơnuk kơna djru.

Tui hăng Khua ding jum Bruă mă tơhan rơka hăng mơnuih mơnam ơi Đào Ngọc Dung lăi: Hăng rơnoh prăk djru anai, tui hăng tơlơi git gai mơ̆ng Ding jum kơđi čar, khua mua pơ ala mơnuih ƀôn sang dêh čar, kơnuk kơna pơkă lĕ, jơlan hơdră djru kơ mơnuih mă bruă hăng mơnuih apah bruă mă bơbeč yua lu klin Covid 19 ngă.

“Kơ jơlan hơdră anai, hăng ƀing hơmâo anăn tui anun lĕ hơdră pơkra ming bruă djru tum teč, rơđah rơđong, hơmâo 3 khul jơlan hơdră phun, mơta sa lĕ khul hơdră djru prăk mơta kơ mơnuih mă bruă pơdơi hĭ jăng jai bruă mă, ƀing rơngiă bruă. Khul dua lĕ khul arăng brơi pơhrŏ rơnoh prăk pơčruh ngă nua pơgang bruă mă, rơnoh prăk pơčruh prăk nua pơdơi abih thun bruă yua tha rơma hăng prăk nua pơgang ƀu hơmâo bruă mă.

Khul klâo lĕ hơdră djru kơ bruă ngă hmua, pla pơjing, rơđah biă mă ñu djru prăk čan mă mơ̆ngKeh prăk pơhlôm nua ƀu hơmâo bruă mă pioh pơphun glăi bruă mă, pơtô hrăm, djă pioh mơnuih mă bruă dŏ glăi mă bruă tơdơi kơ abih klin Covid 19”.

Hrom hăng anun ƀing mơnuih rơngiă bruă mă, pơdơi hĭ bruă mă, ƀu hơmâo bruă kiăng, hăng ƀing mơnuih mă bruă samơ̆ ƀă kman F0, ƀing F1, F2 hơdră djru ăt pơkă rơđah rơđong mơ̆n. Khua ding jum wai lăng bruă mă tơhan rơka hăng mơnuih mơnam ơi Đào Ngọc Dung lăi:

“Kơ tơlơi phiăn pơkă mơ̆ng kơnuk kơna tui anai: Abih bang ƀing dŏ pơjrao Covid 19 dŏ lăi ƀing F0 hăng ƀing mơnuih dŏ pơčlah jing F1 hơmâo tom ƀing dŏ pơčlah hơjăn pơ sang anŏ ƀudah pơ anih pơtum lu mơnuih hai lêng kơ dưi tŭ mă jơlan hơdră djru abih rơnoh prăk pơjrao. Dua lĕ djru prăk ƀong huă 80 rơbâo prăk sa hrơi sa čô hăng hrơi blan djru tui hluai hrơi dŏ pơjrao samơ̆ ƀu rơgao 45 hrơi ôh.

Tơdah pơjrao rơgao 45 hrơi tui hăng hnong djru, laih anun djru sit nik ƀu rơgao 21 hrơi ôh hlơi pô kơnong dŏ pơčlah đôč. Kơnong ƀing anai, tơdah đah kơmơi pi kian djru 1 klăk prăk sa hrơi; đah kơmơi ƀudah pô ama, pô amĭ găl tơlơi phiăn dŏ rông ană gah yŭ 6 thun ăt dưi djru sa čô 1 klăk prăk. Kơnong čơđai anet, mơ̆ng phrâo tơkeng truh 16 thun, dưi djru 1 klăk prăk, pioh blơi gơnam yua mơnong ƀong huă. Dŏ glăi ƀing F2 ƀing ta aka lăi nao ôh, hơdôm tơring čar khom sem lăng rơnoh prăk djru mơnuih mơnam pơkŏn dơ̆ng, ngă gêh găl kơ bruă djru anai. Yua dah hơdră djru anai, aka ƀu djru ba ƀing F2 ôh”.

Nay Jek: pơblang