VOV4.Jarai - Jơlan hơdră “Sóng và máy tính cho em” yua Kơnuk kơna pơphun ngă glăk hơmâo ngă ƀơi Dăk Lăk, hơmâo lu gong gai, anom bruă djŏp gưl, anom bơwih ƀong, ƀing juăt djru mơnuih tơnap tap. Amăng ha blan ha mơkrah pơphun ngă, jơlan hơdră anai hơmâo mă prăk pơčruh, gơnam arăng djru pơƀut glăi rơbêh 5 klai prăk. Mơng anun djru ba lu sang anŏ tơnap tap pơ kual ataih yaih huăi bơngơ̆t dong tah kơ măi mok, hrĕ pơkĕ internet kơ ƀing čơđai hrăm hră amăng mông hơmâo klin Covid-19.

Dŏ tơguăn ngă hră mă sim data djru brơi đôč mơng sang dăng kông Vinaphone, yua VNPT tơring glông Čư̆ M’gar djru ba ƀơi sang hră ană đah kơmơi ñu hrăm, ayong Y Rít Kbuôr, sang anŏ tơnap ƀơi ƀuôn Sut Mđưng, să Čư̆ Suê brơi thâo, tơlơi djru anai yôm biă mă yơh. Sang anŏ ñu hơmâo dua čô ană glăk hrăm gưl sa hăng gưl dua, lêng hrăm mơng ataih amăng internet soh yua glăk hơmâo klin Covid-19. Sang anŏ ñu ƀu hơmâo prăk dăng hrĕ pơkĕ internet ôh, tơdah nô̆p prăk amăng telephôn či pok yua 3G, 4G kơ ƀing ană bă hrăm amăng internet lĕ hrŏ prăk biă, sang anŏ rin rơpa tui ñu jing tơnap hloh. Hăng sim arăng brơi đôč đač dưi pơkĕ internet kơtang biă, tơlơi bơngơ̆t ƀu hơmâo pơkĕ hrĕ internet hrăm mơng ataih mơng sang anŏ jing hơmâo pơsir brơi laih:

 “Ană kâo ha čô hrăm anih 7, ha čô anet hrăm anih 1. Đa hrăm mơguah, đa hrăm tlam. Ăt hrăm amăng telehôn soh yơh, ta khŏm gir yơh. Bơni biă kơ VNPT hơmâo djru ba kơ neh met wa dŏ pơ kual ataih ayaih tui gơmơi anai, kiăng ană bă thâo hrăm online”.

Yă Nguyễn Thị Bích Ngọc, Khua sang hră gưl sa Lê Thị Hồng Gấm, să Čư̆ Suê, tơring glông Čư̆ M’gar brơi thâo, ƀơi anai lĕ kual ataih, mơnuih ƀon sang djuai ƀiă dŏ, lu sang anŏ tơnap tap, hrĕ pơkĕ internet brơi ană bă hrăm mơng ataih jing tơnap. Lơ̆m anun, klin kheng ƀơi anai hai kơtang mơn, bruă hrăm mơng ataih năng ai dŏ sui đôč. Jơlan hơdră djru sim data mơng sang dăng kông kah hăng VNPT, Viettel kơ amĭ ama ƀing čơđai hăng nai pơtô jing djru lu biă mă amăng bruă pơtô hrăm mơng sang hră:

“Anai lĕ tơlơi gum djru phara biă mă, yua dah abih bang ƀing čơđai ƀơi anai lêng tơnap, mang internet hrăm hră ƀu hơđong ôh. Yua hnun tơlơi djru anai klă biă yơh hăng ƀing čơđai đah mơng thâo hrăm mơng ataih, ăt djru ba kơ sang anŏ ƀing čơđai dong mơn, yua dah amĭ ama ƀing čơđai ƀơi anai tơnap tap soh”.

Sang pơkĕ internet nao pơ rim boh sang hră djru sim data

Jing sa amăng hơdôm anom bơwih ƀong nao hlâo pơphun jơlan hơdră “sóng và máy tính cho em” ƀơi anai, ơi Trịnh Văn Dũng, Kơ-iăng khua apăn bruă sĭ mơdrô VNPT Dak Lăk brơi thâo, gơnang kơ Gơnong bruă pơtô hăng pơjuăt, anom bruă hơmâo djru prăk, gơnam rơbêh 1 klai prăk. Hrŏm hăng anun, anom bruă hơmâo pơhrua tui hơdôm anih pơtui hrĕ pơkĕ internet pơhlôm brơi ƀing čơđai pơ kual ataih yaih dưi hrăm mơng ataih. Laih dong, ƀơi hơdôm anom bruă pơdong ƀơi tơring glông ăt djru sim data, djru brơi yua sim mut internet đôč đač kiăo tui tơlơi kiăng ră anai:

“Klin Covid-19 glăk kơtang tui anai lĕ abih bang sang hră aka ƀu dưi hrăm pơƀut ha anih ôh. Ƀing čơđai ăt khŏm hrăm mơng ataih, hrăm online mơn, laih anun amăng mrô anun ƀing čơđai sang anŏ tơnap lĕ lu biă mă, ƀu hơmâo măi mok, aka ƀu pơkĕ hrĕ dăng internet. Mơng anun yơh, ngă hrŏm hăng Gơnong bruă pơtô hăng pơjuăt, VNPT hơmâo djru ba măi tinh bảng, sim data, mrô prăk djru ngă bruă anai lĕ 1 klai prăk”.

Rơbêh 400.000 čô čơđai sang hră ƀơi Dak Lăk ăt hrăm online mơn.

Tui hăng mrô jŭ yap mơng Gơnong bruă pơtô hăng pơjuăt tơring čar Dak Lăk, tơdơi kơ giăm ha blan ha mơkrah pơphun jơlan hơdră “sóng và máy tính cho em”, truh ră anai tơring čar hơmâo mă prăk arăng djru, gơnam djru hơmâo nua rơbêh 5 klai prăk. Amăng anun, kơnong ƀing khua, mơnuih mă bruă amăng khul mut phung mơnuih mă bruă hơmâo djru năng ai 4 klai prăk kơ keh prăk “máy tính kơ ƀing adơi”. Mrô dŏ glăi yua anom bơwih ƀong, ƀing thâp pap djru ba. Ơi Đỗ Tường Hiệp, Kơ-iăng khua Gơnong bruă pơtô hăng pơjuăt tơring čar Dak Lăk brơi thâo, prăk hăng gơnam arăng djru amra mơit nao kơ anom bruă pơtô hrăm. Kiăo tui tơlơi kiăng, hơdôm anom bruă amra blơi măi mok djru ba ƀing čơđai sang anŏ tơnap, sang anŏ rin, giăm rin, čơđai sang anŏ kơƀah tơnap yua klin Covid-19 ngă. Ră anai jơlan hơdră anai ăt glăk iâu pơthưr abih bang djru ba dong mơn:

“Jơnum min mơnuih ƀon sang tơring čar git gai kơ Gơnong bruă pơtô hăng pơjuăt lăi pơthâo pơphô bruă jak iâu abih bang mơnuih ƀon sang, hơdôm anom bruă, khul grup ƀơi Dak Lăk djru ba kơ anom bruă pơtô hrăm, brơi kơ ƀing čơđai sang anŏ tơnap, čơđai sang hră rin, čơđai bơbeč yua klin Covid-19 ngă dưi hơmâo măi computer, măi mok hrăm mơng ataih tui glông internet, pơhlôm pơdơi nao pơ sang hră samơ̆ ƀu pơdơi ôh bruă hrăm”.

Tơring čar Dak Lăk ră anai hơmâo rơbêh 400.000 čô čơđai sang hră djŏp gưl hrăm, yua klin Covid-19 glăk kơtang, čơđai sang hră amăng tơring čar khŏm hrăm mơng ataih tui glông internet. Samơ̆ tui hăng mrô jŭ yap mơng anom bruă pơtô hrăm, hơmâo rơbêh 67.000 čô čơđai ƀu hơmâo măi hrăm hră, abih bang ƀing anai lêng kơ sang anŏ tơnap, sang anŏ rin, giăm rin dŏ pơ kual ataih yaih. Bruă djru mơng djŏp gưl, anom bruă hăng hơdôm anom bơwih ƀong, ƀing thâo khăp pap tui jơlan hơdră “sóng và máy tính cho em” glăk ba glăi kơ ƀing čơđai tơlơi hok mơ-ak, djru bruă pơtô hrăm amuñ hloh./.

Công Bắc: Čih - Siu H’Mai: Pơblang